Голосник

20 років Капелі Древутня

0

В минулу суботу, 12. мая 2018 р., в Центрі Культуры в Люблині при ул. Пеовяків 12, проходил вечерній концерт названий Капеля Древутня з приятелями (Kapela Drewutnia i przyjaciele). То з нагоды 20-літя ансамблю, котрий на свій ювілей запросил і другы ґрупы, залюблены – як і ювіляты – в шыроко понятій фольковій музыці. Центр Культуры выполнил ся дочыста, а орґанізаторы суботньой акциі мусіли докладати кресла, якых і так вшыткым не старчыло, бо охочых видіти Древутню было вельо.

Нич присутны мали змогу почути на сцені самых ювілятів, выступили на ній запрошены ансамблі, котрых радше никому не треба было представляти, бо прибывшы до Люблина святкувати з ювілятами ґрупы то абсолютна вершына корінного граня і співаня. Зачал Бурдон зо Львова, знаний з захопліня в великій мірі карпатском музыком, посеред котрой в репертуарі нашли ся і русиньскы пісні. Дальше на сцену вышла Верховина з Варшавы – яка недавно святкувала своє 25-літя – єдна зо старшых на польскій фольковій сцені, маюча давнійше вельо лемківского репертуару, а днес, як вокальний ансамбль, выспівуюча східньославяньскы пісні в традицийным стилю. Цікавом офертом для присутных была тіж Лемківска Сельска Капеля «Угерец» з Люблина, котрой цілю являт ся представити лемківску музыку в як найбарже корінний, суровий спосіб, даючы слухачам почутя найдавнійшой давнины.

По короткій перерві на сцену вошла Капеля Древутня, яка заміреным мала вказати такой цілу свою 20-літню історию репертуару, як і люди, понеже інтересуючо зарежысеруваний спектакль мал представити і доробок, і членів (актуальных і велику част бывшых), котры в ансамбли грали і співали за цілий період істнуваня. І першых, і другых было шувні. Зато на концерті мож было было почути шанты, дуже фольковых опрацувань, авторскы співанкы і другы, котры за двадцет років встигла Древутня вказати на вельох сценах світа.

Члены ґрупы фурт мают вельо втіхы зо своіх діянь, а на обшырну част іх творчости складают ся русиньскы-лемківскы співанкы. До того польскій, украіньскій фольклор, музычны інспірациі з заграниці і вельох другых місц, што цілістю обнимат богатий репертуар, котрий, як самы бесідуют, до кінця можут ани не спамятати. Але Древутня не ограничат ся лем до граня фольклору. В своім часі выдумала і, будучы головным орґанізатором, провела фольковий фестіваль коляд Славянщыны, активно бере участ в локальных подіях і спілпрацує з культуральныма і науковыма єдиницями реґіону. Недавно выдали платню з музыком славного польского барда Яцека Качмарского, а тепер роблят над новым материялом, котрий в патріоточных піснях навязує до тогорічных святкувань 100-літя одзысканя Польщом незалежности.

Капеля Древутня то ансамбль, якій фурт грат з великым заанґажуваньом, енерґійом і серцьом, што видно на каждым іх концерті. Петро Зюлек, шеф ансамблю, бубняр і головний спікер выступів все весело вводит обзераючых і слухаючых в кажду поєдну співанку, а доґадуючы му другы члены довершают радіст з граня і співаня. Не лем по тым мож познати, же 20 років спільного гудакуваня непрестанно дає ім тілько щестя. Не каждий ансамбль так знат, а неєден так долгого періоду істнуваня не вытримал. За тото велика подяка Капели Древутня і щыры желаня дотримати до наступных такых ювілеів.


Петро Зюлек, шеф Капелі Древутня, для радия ЛЕМ.фм:

Шеруй.

О авторі

Демко Трохановскій

Актуальні ховат дві дівкы, а медже, по і попри тым - шефредактор інтернетового порталю lem.fm. Любитель языків. Вшыткых языків.

Коментар