Голосник

60. уродины Андрия Копчы – на многы і благы літа!

Днес минят рівно 60 років, коли в Хобєні, недалеко Волова, на світ пришол Андрий Копча. Вродил ся 10. вересня 1954 рока в родині Івана і Емілиі (з д. Квочко). Студиювал культурознавство на Вроцлавскым Університеті і режысерию в Державній Высшій Фільмовій, Телевізийній і Театральній Школі в Лодзі.

Знаний єст предовшыткым з соспільной діяльности як ведучий Стоваришыня Лемків (єст єдным з основателів СЛ), першой повыселенчой лемківской орґанізациі, сотвореной одраз, як лем змінило ся право тыкаюче реґістрациі стоваришынь. Ведучым єст од початку діяльности, т.є 7. квітня 1989 р. аж до днес. Од І Світового Конґресу Русинів в 1991 р. єст членом Світовой Рады Русинів (єдну каденцию был єй шефом).

Андрий Копча то тіж режысер, сценариста і писатель. Дебютувал в 1980 р. в Польскым Радию слуховиском Фауль. Кінцьом 80. років ХХ столітя пише знану драму Одтяте коріня, а потім єй продолжыня під наголовком Остатня година, якы выставлят разом з Театром Стоваришыня Лемків. На початку ХХІ столітя на основі своіх сценариів реалізує 2 фільмы: Акция “Вісла” і другу част На чужыні.

 

З нагоды днешньой річниці, желаме Вам, пане Андрию, вельо здравля і щестя НА МНОГЫ І БЛАГЫ ЛІТА!

Радийо ЛЕМ.fm

Стоваришыня Руска Бурса

 

Шеруй.

О авторі

Демко Трохановскій

Актуальні ховат дві дівкы, а медже, по і попри тым - шефредактор інтернетового порталю lem.fm. Любитель языків. Вшыткых языків.

Коментарі