Голосник

70 років церкви в Любіні

0
17. червця/юнія 2019 рока в православній церкви св. Тройці в Любіні, в другій ден Зеленых Свят (Сошествя Святого Духа), празднувано 70 років основаня парохіі.
Торжественны божослужыня очелил Высокопреосвященійшый Владыка Юрий, предстоятель вроцлавско-щеціньской єпархіі, в чысленній асисті священників з любіньского, вроцлавского і зеленогірского деканатів. Своім співом богослужыня прикрасил парохіяльный хор веденый Анном Андриянов. По службі вшыткы участникы свята взяли участ в спільній гостині зрыхтуваній парохіянами.
Теперішній парох єст шестым ґаздом любіньского храму од початку основаня парохіі. Єй вірны сут в більшости Лемками выселеныма в 1947 році з рідной землі. До любіньской парохіі приналежат тіж жытелі Нємстова, Хрустніка, Осєка, Польковиц, Домбровы, Сєдлец, Кжечына, Сцінавы, Чмеля, Ґужицы і Ґолі. В послідніх роках церков перешла великє преображыня завдякы великой красы розписови. Святыню розмалювал іконоґраф Алексий Адамчук з Украіны. Актуальный вид церкви справлят, што тяжко повірити, же будинок храму, то колишня саля до ґімнастикы.
Любіньска парохія є активном не лем під оглядом церковных діянь. Од 2007 рока орґанізує стрічу з лемківском культуром пн. «Лемківскє Літо» (про тогорічну едицию чытайте за тым мотузком).
Власти Стоварошыня «Руска Бурса» і радийо ЛЕМ.фм взяли участ в тій шувній подіі на запрошыня отця Богдана Репелы, пароха любіньской церкви.
Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Контакт: natalia@lem.fm

Коментар