Голосник

Александер Дулеба святкує 50 років

0

Днесь минать 50 років од народжіня Александра Дулебы, русиньского політолоґа, універзітного педаґода і першого председы Округлого стола Русинів Словеньска. Дулеба ся орьєнтує на досліджіня загранічной політікы Словакії і внутрішньой і загранічной політікы держав выхдоной Европы з акцентом на їх одношіня з Европсков унійов.

Народив ся Александер Дулеба 5-го октобра 1966-го року у Свіднику і своє дітинство пережыв в русиньскім селі Бенядиківці, свідницького окресу.

В роках 1984 – 1989 штудовав на Філозофічній факулті Київской державной універзіты Тараса Шевченка на Україні (втогды Совітьскый союз). Тітул кандідата наук здобыв із теорії політікы на Універзіті Коменьского в Братіславі, де быв у 2009-ім році габілітованый. Дулеба так само абсолвовав штудійны стажы – на Рурскій універзіті в Бохумі в Німецьку у 1992-ім році, на Інштітуті про выдоевропскы штудії Уппсалской універзіты у Швеції в році 1995 і стаж в рамках індівідуалной дослідньой штіпендії НАТО, котру абсолвовав в роках 1996 аж 1998.

Од авґуста 1990-го року до мая 1993 року робив як дослідный робітник на Катедрі соціалных і політічных наук Філозофічной факулты Павла Йозефа Шафарика в Пряшові (днесь Пряшівска універзіта в Пряшові), потім быв дослідным робітником Словацького інштітуту міджінародных штудій при Міністерстві загранічных діл Словацькой републікы. Од септембра 1995-го року робив як дослідный робітник Досліднього цента Словацького общества про загранічну політіку (Slovenská spoločnosť pre zahraničnú politiku), котрого є од мая 2010-го року директором. В сучасности окрім іншого діє і як высокошкольскый педаґоґ, ці на Словакії в Пряшові, но і за граніцями – в Ґрузії, де передавать лекції на універзіті в Тбілісі. Часто є кликаный на різны конференції дома і за граніцями. Быв єдным із тых, котры офіціално запрошены на стрічу во Вілнюс в 2013-ім році, де ся мало їднати о асоціачнім договорі міджі Европской унійов і Українов. По скорых змінах політічных поглядів втогдышнього презідента Україны тота стріча наконець не одбыла ся.

Дулеба актівно занимать ся і вопросами русиньской народностной меншыны. У 2010-ім році быв єдным із ініціаторів заснованя політічной партії Наш Край, котра мали служыти головно на то, жебы через выборы могли перейти кандідаты, котры бы ся присвячали русинськым інтересам і реґіону, де жыють Русины.

В октобрі 2012-го року выникнув Округлый стіл Русинів Словеньска (ОСРС). На своїм другім засіданю, 1-го децембра того самого року, членове платформы повірили веджіньом ОСРС Александра Дулебу. Дулеба быв во функції председы до яри 2013-го року. Про свої робочі обовязкы не хотів далше кандідовати на тоту функцію, но єдночасно з тым і далше зістав головным коордінатором документу під назвов Проґрам розвитку русиньской народостной меншыны в Словацькій републіці, котрый ОСРС закінчів і прияв в маї 2015-го року.

Дулеба є автором многых фаховых публікацій і науковых статей. Жыє в Братіславі.

Жрідло фотоґрафії: www.sfpa.sk

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар