Голосник

«Архів Новиця-Прислоп» з новым сайтом

0

Початком 2016 рока, на нашым портали інформували сме про свіжий проєкт – соспільну ініциятиву, занимаючу ся гляданьом архівальных материялів, звязаных з лемківскыма селами Новиця і Прислоп на середній Лемковині. То «Архів Новиця-Прислоп», котрий редакцию ЛЕМ.фм+ повідомил посліднім часом о дальшым розвитку, тым разом в просторі нового інтернетового сайту.

В новым вымірі сайту годны будете найти інформациі про сам проєкт, вельовікову історию сел, тото, што ся в них находило та находит (будівництво, кресты, капличкы, ремісничы варштаты, цмонтері). Окрем того, сайт даст доступ до мап сел з ріжных історичных періодів, од 1850 до 1943 років. Сайт має замірене вказувати і архівальны документы, або інформациі з медий, в котрых были спомнены Новиця і Прислоп. Презентуваны сут на ним подіі, котры гейбы постійно одбывают ся на териториі обох сел (прим. Інновиця, Літні Музычны Стрічы, Джез Без). Уж днес видно по будові сайту, же вельо місця буде присвячене найпопулярнійшому з ремесел, котре, як раз, сильно там фунґувало – вырабляня деревяных лжыц. На днес сайт є фурт в розбудові, прото деякы части і функциі можут быти недоступны.

«Архів Новиця-Прислоп» то цікава ініциятива – тзв. соспільний архів. Доднес не вказала ся сатисфакцийонуюча дефініция того рода проєктів, хоц штораз місцнійше сут они достеріганы в соспільным просторі. Проєкт фурт глядат заітнересуваных вольонтерів, котры мали бы задачу роботу над архівальныма материялами, та дальшу іх діґіталізацию. Архів фотоґрафій роблений єст в проґрамі, котрий каждій знимці надає окремий номер. Окрем того, систем має єрархічну структуру. Ціль проєкту то охорона і промоция культуровой спадковины – в тым лемківской, через заанґажуваня теперішніх і бывшых жытелів сел, осіб зо світа, вольонтерів та другых стоваришынь.

Діяня Архіву являют ся долготерміновы, прото першым етапом проєкту є переведіня вступных тереновых досліджынь – збераня, евіденция і діґіталізация авдийовізуальных, документацийных та іконоґрафічных материялів. По завершыню проєкту, ціла колекция буде безплатно доступна на реченым сайті.

Хоц більшіст русиньскых сел на Лемковині днес не є уж заселене Лемками, Новиця і Прислоп то місцевости, в котрых прожыват гідні лемківскых родин. При нагоді вартат спомнути, же села Прислоп як окремой адміністрацийной єдиниці уж неє – было влучене до сусідньой Новиці. Новиця то єдно з 9 сел на Лемковині, маюче двоязычну таблицю з назвом місцевости. В Новици своі сідибы мают три стоваришыня, про котры інформує і сам сайт – Братство Грекокатолицкой Молодежы «Сарепта», Стоваришыня «Маґурич», занимаюче ся ратуваньом сепулькралной дідовизны Лемковины, та Стоваришыня «Приятелів Новиці». Taк в Новицi, як і Прислопі, находят ся грекокатолицкы храмы, а в першым з сел, окрем церкви св. Параскєвы, положена єст каплиця Успіня Пресвятой Богородиці з 1889 рока. То попри ній рік-по-рік рыхтуваны сут кєрмешы з нагоды праздника Успіня Пресвятой Богородиці (фотореляция з тогорічного свята – за тым мотузком).

фото горі: прінтскрін з сайту

Шеруй.

О авторі

Севериян Косовскiй

Народженый на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар