Голосник

Архівальна бесіда з архієпископом Єремійом – віторок, 20.00 год.

0

Рік може ся видіти як барз мало, коли подумат ся о тырваню всесвіта. Але рік то тіж 12 місяців, 52 тыжні, 365 дни, вкінци 8 760 годин. Коли одходит хтоси близкій, важний для нашого жытя, то кажда минута без него може ся немилосердні должыти. Днес припадат докладні рік од смерти выдатного теолоґа, академіцкого професора, тлумача церковных, богослужебных текстів, а передовшыткым непересічного душпастыря, котрий вказувал дорогу не лем своім вірным – владыкы Єреміі.

17. квітня/апріля 2017 р. вмер Архієпископ Вроцлавскій і Щеціньскій Єремія, котрий долгы рокы завідувал вроцлавско-щеціньском єпархійом, яку ериґувано в 1951 р. на обшыри земель, де выселено Лемків. Просиме слухати архівальне інтервю з владыком Єремійом, котре кінцьом 2016 р. провела Олена Стефановска. Почуєте спомины владыкы м.ін. про тото, коли перший раз почул про Лемків, як познал іх історию, о реляциі з владыком Перемышльскым і Новосандецкым бл.п. Адамом. Владыка поділил ся своім думаньом про підхід Церкви в квестиі підпераня вчыня рідного языка, переклады літурґічных текстів на лемківскій язык та про тото, што думал про діяльніст Петра Трохановского.

Проґрам высыламе днес о 20.00 год., повторіня вночы з віторка на середу о 4.00 год. та в найблизшу суботу о 14.00 год.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Контакт: natalia@lem.fm

Коментар