Архієпископ Єремія не жыє

0

В ночы, 17. квітня/апріля 2017 рока, вмер Высокопреосвященнійший Кыр Єремія, Архієпископ Вроцлавскій і Щеціньскій.

Блаженной памяти владыка Єремія народил ся 3. жолтня/октобра 1943 рока в селі Одринкы (по білорускы Адрынкі) на Підляшы. В 1957 році вступил до Православной Духовной Семінариі во Варшаві, котру завершыл по штырьох роках. Дальше студиювал на Християньскій Теолоґічній Академіі во Варшаві, в Московскій Духовній Академіі, а в роках 1966-1968 в Цуріху. Владыка Єремія был інтелектуалистом, долголітнім професором Християньской Теолоґічной Академіі во Варшаві. Од 1996 р. был єй ректором, выполнял тоту функцию через три каденциі.

Православна Єпархія Вроцлавско-Щеціньска, яком завідувал блаженной памяти владыка Єремія од 1983 рока, є місцьом прожываня Лемків, якы 70 років тому были насильно выгнаны з Лемковины і оселены на тзв. землях одзысканых, та іх потомных. З тых земель в 1951 році была ериґувана вроцлавско-щеціньска єпархія.

Похоронны богослужыня Владыкы зачнут ся заран, 18. квітня/апріля т.р., о 9.00 год. в катедральным соборі Рождества Пресвятой Богородиці во Вроцлаві. Дальше, 19. квітня/апріля т.р., тіло покійника буде перевезене до Варшавы, де пак буде зложене до гробу на православным цмонтери на Волі.

2. лютого/фебруара 1983 рока товдышній митрополита Варшавскій і цілой Польщы Василий высвятил Йоана Анхімюка на діакона, а о пару днів на священника. 26. лютого/фебруара 1983 был постріжений на монаха з меном Єремія. 6. марця того самого рока Святий Собор Польской Автокафельной Православной Церкви покликал го на владыку, а 13. марця в соборі св. Мариі Магдалины в Варшаві был хіротонізуваний на єпископа Більского, вікария Варшавской митрополиі. Чын хіротоніі совершыли митрополита Варшавский бл.п. Василий, єпископ Білостоцкій і Ґданьский Сава, єпископ Лодзіньсккій і Познаньскій Симон, та єпископ Перемышльский і Новосандецкій бл.п. Адам. Владыка был активным участником екуменічного діалоґу в Польщы і во світі. В 2001-2006 роках был ведучым Польской Екуменічной Рады.

Архієпископ Єремія одвиджал Лемковину, предовшыткым вчас поломництв на гору Явір. На переломі 2016/2017 рока встигли сме іщы побесідувати з владыком, котрий дал радию ЛЕМ.фм обшырне інтервю.

Вічна Памят! Христос Воскрес!

Share.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

Коментар

Zrealizowano dzięki dotacji Ministra Spraw Wewnętrznych i Administracji.
© Copyright by лем.fm. 2017. Вшыткы права застережены.