Голосник

Автобус з Пряшова на літак до Ряшова штораз ближе

0

Уж о два тыжні жытелі Пряшівской Руси будут мочы выгідні добрати ся до підряшівского летовиска в Ясюнці. Заєдно з інавґурацийом льотів Ряшів–Ню Йорк (30. квітня/апріля) рушают реґулярны автобусовы получыня зо Словациі на летовиско в Ясюнці. То заповіданий в половині лютого/фебруара результат спілпрацы самоурядів підкарпатского воєвідства і пряшівского краю.

Автобус зачне курс в Кошыцях, пак через Пряшів, Барвінок, Коросно дотре до Ясюнкы, так жебы пасажыры могли комфортово встигнути з одправом на льот за тзв. велику млаку. Подібні буде з курсом назад, котрий додатково буде скомунікуваний з літаком, што вертал буде з Тель Авіву. Комерцийном транспортовом компанійом обслугуючом тото автобусове получыня буде Транс-Европа з Ряшова.

Перед парома днями, 12. квітня/апріля, в Пряшові проходила робоча стріча в тій справі. Бесіды тыкали головні промоциі автобусового получыня та інформуючых діянь. Польску страну репрезентувал Міхал Табіш – презес Льотничого Порту в Ясюнці, Томаш Лейко – пресовий представник Маршалківского Уряду Підкарпатского Воєвідства (МУПВ) та Йоанна Сітаж з Департаменту Промоциі і Господарчой Спілпрацы МУПВ. Зо словацкой страны присутний был м.ін. Юзеф Цволіґя – директор Уряду Пряшівского Краю. О дрібницях бесідувано пак на пресконференциі.

Для жытелів Пряшівского Краю летовиско в Ясюнці є найблизшым, котре оферує трансконтинентальны получыня. Орґанізаторы і думкодавці получыня рахуют тіж, што буде оно хоснуване і в туристичных цілях, заєдно через туристів з Польщы, як і зо Словациі, а тіж што автобусовых курсів буде штораз більше. Обі страны задеклярували заанґажуваня в проєкт туристичных орґанізаций – Підкарпатской Реґіональной Туристичной Орґанізациі та єй словацкого одповідника.

фот. Пресовы материялы МУПВ

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Контакт: natalia@lem.fm

Коментар