Голосник

Авторска стріча з Криціньскым і Скроком

0

Выдавництво Лібра з Ряшова просит на авторску стрічу з двома писателями, якы в своій творчости односят ся м.ін. до териториі Лемковины. Станіслава Криціньского та Здзіслава Скрока буде мож стрітити в найблизшу суботу, 30. вересня/септембра, о 18.00 год. в кіні «Конькрет» в Затварници. 

Як інформує орґанізатор подіі, вчас стрічы буде мож почути про Лемковину, Бєщады ци Погіря. Станіслав Криціньскій, хоц має хімічну освіту, од років занимат ся історийом і краінознавством – головні обшыри Карпатскых Гір. Є він автором чысленных публикаций, написал м.ін. «Деревяны церкви в Карпатах», «Бєщады. Історично-краінознавчий словник» (дві части), «Перемышль і Перемышльскє Погіря», «Церкви в Бєщадах». Вартістне, што автор переказує тото, же од 70. років XX ст. пенетрувал обшыр Бєщад, Лемковины та Погіря, документучы світ, котрого уж неє.

Здзіслав Скрок подібні як Криціньскій вертат до світа, котрого уж неє. Ріжниця є лем в тым, што Скрок занимат ся досліджаньом м.ін. східніх Кресів давной Польщы – Поліся, Віленьщыны, Подоля, але тіж і східніх Бєщадів. Єдном з барже знаных публикаций того автора є презентувана долов на афішы книжка «Кыршыны Атлянтиды». 

Шеруй.

О авторі

Севериян Косовскiй

Народженый на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар