Біженці та нацийональны і етнічны меншыны. Конференция в Познані

0

9. марця 2018 р. на Выділі Права і Адміністрациі Університету ім. Адама Міцкєвича в Познані пройде наукова конференция присвячена проблемам, з якыма стрічают ся біженці та нацийональны і етнічны меншыны. 

Орґанізатором конференциі пн. «Біженці та нацийональны і етнічны меншыны. Правны, політичны і соспільны квестиі» є Науковий Кружок Американьского Права «Тhe American Law Society». Єдным з сутьовых єй заложынь є дискусия при схоснуваню філософічного, економічного, політолоґічного, правного та социйолоґічного знаня про проблемы сучасного світа, што звязаны сут з явисками міґрациі, сепаратизму та нацийональных меншын.

До участи, окрем досвідченых дослідників, прошены сут докторанты та студенты, котры хотят пошырити і поділити ся присвоєныма знанями тыкаючыма ся темы біженців і меншын заселяючых Польску Республику та другы державы. Серед пропонуваных тем конференциі мож найти м.ін.: «Вельонацийональны державы і іх фунґуваня», «Нацийональны меншыны а сепаратистичны рухы», «Понятя етнічной ґрупы», «Ріжниці медже нацийональном меншыном а етнічном ґрупом» ци «Проблемы деякых етнічных ґруп в Польщы». В пропозициях мож найти і поєдны наголовкы, якы ся будут односити до ситуаций поєдных меншых в ріжных державах світа (прим. ситуациі мексиканьской меншыны в ЗША, мароканьской меншыны в Ішпаніі і Франиці, украіньской меншыны в Польщы ци турецкой меншыны в Німцьох). 

Тым, котры хочут взяти участ в конференциі як прелеґенты, треба переслати реферат на свобідну тему повязану з приведеныма горі проблемами до 16. лютого/фебурара 2018 р. Дальшы інформациі чытайте за мотузком

Share.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

Коментар

Zrealizowano dzięki dotacji Ministra Spraw Wewnętrznych i Administracji.
© Copyright by лем.fm. 2018. Вшыткы права застережены.