Голосник

Буковскый бы привітав конзултації з презідентков

0
Уповномоченый влады Словацькой републікы про народностны меншыны Ласло Буковскый очекує, же зміна на посаді презідента Словакії буде значіти і векшу а тырвалу проактівіту в припаді інтересу о проблематіку народностных меншын. Інформує о тім пресова аґентура TASR.

„І од моралной підпоры з боку найвысшой авторіты буде залежне, ці меншыны будуть чути ся на Словакії дома,“ звернув увагу Буковскый.

Дотеперь презіденты без інтересу

Уповномоченый припомянув, же подобно як в іншых областях, і в припаду практікованя прав народностных меншын бы мав презідент выражати ся одкрыто односно позітівных і неґатівных тенденцій.

За пріорітны темы, котры бы ся мали в тім контексті появльовати в діскурзі новой презіденткы Зузаны Чапутовой, належыть за думками Буковского штонайшырша аплікація языковых прав, акцентованя важности народностного школства, ефектівна підпора културы народностных меншын і партіціпація.

„Жаль Богу, за остатні рокы сполочность не дістала од головы державы релевантну позіцію односно тых тем,“ припомянув уповномоченый і єдночасно оцінив, же першы выражіня і рішіня презіденткы назначують зміну. Презідентка наприклад уж зрядила експертный порадный орґан про область народностных меншын, де суть представителі трьох найвекшых меншын на Словакії – мадярьской, ромской і русиньской. Навеце є в тім орґані членка, ктора заступать решту меншын і новы меншыны, значіть такы, котры не мають на Словакії іщі статус народностной меншыны.  Зузана Чапутова веце раз акценотвала, же хоче быти презідентков вшыткых, включно народностных меншын, котры на Словакії жыють.

Хотів бы конзултації з презідентков

Буковскый є одкрытый думці реґуларных конзултацій меджі його урядом і презідентков.

„Привітав бы єм наприклад і то, покля бы представитель презідентьской канцеларії, або член їй фахового тіму про меншыновы вопросы, як покликаный член реґуларно брав участь на засіданях Выбору про народностны меншыны і етнічны ґрупы і годен быв черьпати інформації з першой рукы,“ повів про аґентуру Буковскый.

Нова презідентка у своїм уряді іщі лем зачінать. Інавґурація проходила в суботу 15-го юна 2019-го року в рамках святочного засіданя Народной рады Словацькой републікы в просторах в просторах Словацькой філгармонії.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар