Черевікы Варголя за більше як $400.000!

Енді Варголь – світовий король поп-арту, Русин, перешол до істориі як маляр, рисовник, фотоґраф і перформер. Його меньше знаным занятьом было творіня проєктів черевіків. Ескізы Варголя з том частю його творчости нашли купця, якій годен был заплатити за них більше як 400 тис. дулярів!

фот. creativereview.co.uk

фот. creativereview.co.uk

Енді Варголь сотворил в своім жытю вельо барз знаных діл. Рисункы черевіків не были єднак найбарже знаным проявом його творчости, хоц ілюстрациі тых же были специялністю початку карєры пізнійшого короля поп-арту. Може ся тото змінити, зато же ескізы з черевіками недавно были проданы за ок. 416 тис. дулярів, а то більше як 1,56 млн. польскых злотых.

В 50. роках ХХ столітя артиста робил для комерцийных маґазинів («Glamour» і ін.), де творил м.ін. проєкты черевіків. Такє занятя добрі вписувало ся в творчіст Варголя, якій был захоплений предметами штоденной потребы – од розславленых пушок з зупом, аж по дуляровы банкноты. В 1949 році при першій публикациі рисунків черевіків при підписах, правдоподібно через описку, страчено в його назвиску букву «а» – од тамтого часу Енді (Андрий) Вархола то Енді Варголь, котрий сам зачал ся так підписувати. В 1955 році достал великє замовліня на серию рисунків черевіків до недільного «New York Times». Достал за тото заплату $100.000.

На аукциі в Лондоні перед парома днями зліцитувано серию 18 ескізів з видом черевіків. По роках, самы рисункы продали ся ліпше, як запроєктуваны черевікы.

фот. creativereview.co.uk

фот. creativereview.co.uk

Про автора

Наталія Малецка-Новак
Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од штырьох років доносит о вшыткым, што ся діє на Лемковині. І не лем. Контакт: natalia@lem.fm

Коментар