Голосник

Через вікенд фестівалова Біловежа і Меджілабірці

0
Найблизшый вікенд русиньска култура в подобі народной музикы і говореного слова завітать до села Біловежа і до Меджілаборець. На обиддвох подіях буде што посмотрити
Свята будителів

Свята русиньскых будителів Духновіча і Павловіча є назва вже 37-го річника фолклорного фестівалу в селі Біловежа, в окресі Бардейов. Тот буде проходити в неділю 24-го юна 2018-го року і проґрам подля орґанізаторів, котрыма суть окрім села Русиньска оброда на Словеньску і Вышньошарішскый освітній центер, буде досправды богатый.

Цілоденый проґрам зачне літурґійов в містній ґекокатолицькій церькви, котра буде по церьковнославяньскы. По ній одбуде ся споминова подія на будителів Александра Духновіча і Александра Павловіча на дворі містной фары. Обидвоми будителі в селі служыли на парохії. Од фары піде наслідно кройованый ход ку амфітеатру, котрый є коло Сельского уряду.

Проґрам на амфітеатрі зачінать о 14.00 год. Участны ся можуть тішыти на выступы такых колектівів і інтерпретів як Барвінок, Біловежанка, дуо Шуркаловых, дуо Карашовых Вінок ці гостів із Україны – дуо Верохинка і ґрупу Фатьови. Русиньске слово одпрезентують Миколай Коневал і Іґор Латта – аліас Кум Мачанка.

В рамках події одбуде ся і выставка образів русиньскых малярів, котру буде мож видіти в салі Културного дому.

В Меджілабірцях знова і шпортово

В Меджілабірцях од пятніці буде проходити вже 56-ый річник Фестівалу културы і шпорту, котрый орґанізує місто Меджілабірці у співпраці з Русиньсков обродов на Словеньску. Головный проґрам, де мож видіти найвеце русинського репетоару, буде проходити в неділю 24-го юна, хоць наш професіоналный ПУЛЬС є напланованый на суботу вечур.

В неділю ся на сцені містного амфітеатру представлять Скеюшан з Чеськой републікы, Фолклорна ґрупа Камяна, Співацька ґрупа Калина, Лабірьскы бетяре, Тріо Кантарь ці популарне Русиньске тріо, котре популаріту здобыло выступаньом в телевізній шов Zem spieva. Головным тяглом русиньского проґраму в неділю буде ґрупа Русин Чендеш Орхестра.

Комплетный проґрам обидвох подій можете найти на плаґатах під статьов.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА


Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар