Голосник

Через вікенд концерты церковной музыкы

0
В днях 6.-8. липця/юля на Лемковині проходити будут концерты церковной музыкы. Уж дакотрий рік запоряд фестіваль «Церковна Музыка в Низкым Бескіді» загостит в грекокатолицкых і православных храмах.

На тогорічній едициі выступялт два хоры. Приіздний буде грекокатолицкій хор «Слідами Херувимів» з парохіі свв. Віры, Надіі і Любови зо Льовова, котрий своім концертом в найблизшу пятницю отворит фестіваль. Найперше буде мож видіти іх концерт о 17.00 год. в храмі св. Параскєвы в Панкній. В тот ден хор выступит іщы в сусіднім селі, в грекокатолицкій церкви Вознесіня Господнього в Ґладышові, де концерт зачне ся о 19.00 год.

Концерты львівского хору в суботу будут проходити од 11.00 год. в грекокатолицкых церквах св. Параскєвы в Новици, Рождества Пресвятой Богородиці в Лоси (бл. Ґорлиц) і наконец в Ґорлицях в храмі Преображыня Господнього.

Послідній ден тогорічной едициі фестівалю то концерты православного Мужского Камерального Хору «Клірос» з Ґорлиц. Перший концерт того дня зачне ся о 16.00 год. в православній церкви св. Михала в Высовій. Завершыньом подіі буде вечерній концерт в кафедральным храмі св. Тройці в Ґорлицях.

Орґанізаторами дальший рік являют ся Староство Повітове в Ґорлицях, Грекокатолицка та Православна парохіі в Ґорлицах. Спілорґанізатором є Місто Ґорлиці. Почестний патронат тримат ґорлицкій староста Кароль Ґурскій.

Шеруй.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар