Голосник

«Чудный гробовый дух» Петра Поляньского і курс народных водителів в Великым Березным – проґрам «Говорить Пряшів» – пятниця, 18.10 год.

Радийо Русин.фм з Братиславы як каждый тыжден приносит порцийку вісти о плянуваных культурных подіях і роботі русиньскых інституций – Музею Русиньской Культуры, Театру Александра Духновича, ансамблів ПУЛьС і Рутенія.

В Книжници.фм пан бібліотекар, Ігор Латта, буде чытал урывок оповіданя Петра Поляньского пн. «Чудный гробовый дух».

Целебритком того тыжня буде Наталия Дудаш, писменниця, тлумачка, публицистка, драматуржка і політична діячка. Вродила ся 15. грудня/децембра 1958 р. в Рускым Керестурі в Югославіі. Скінчыла ґімназию в Рускым Керестурі і філолоґію на університеті в Бельграді. В роках 1981-1989 робила як редакторка «Літературного слова» – додатку до тыжденника «Рускє слово». Для радия Новый Сад писала пєсы. Наталия Дудаш была і директорком выдавницва «Рускє слово», а в роках 1998-2000 заєдно віцеміністром культуры Сербіі. Політичні была повязана з режімом Слободана Милошевича, особливо коли проходила громадяньска война в Косові.

Свою літературну творчіст зачала Наталия Дудаш іщы як учениця ґімназиі. Писала поезию, оповіданя і есеі. Была діячком русиньской орґанізациі «Руска матка». В 1997 р. выдала антолоґію поезиі зо вшыткых держав, де жыют Русины/Лемкы пн. «Рускы пісні».

В 2000 році втекла з Сербіі до Канады.

Петро Медвід в Перличках прочытат пару короткых вісти, котры были надрукуваны в підкарпатскій ґазеті «Неділя» в місяци грудни/децембері 1942 р. Буде про зиму. Наперед про тото, же на Тисі вломил ся лед під дітми, котры санкали і козали ся. В Стакчыні нещестя – авто з дырвами притиснуло єдного робітника. Проходил курс народных водителів молодежы в Великым Березным. Прошла контроля цін продаваных птахів: за куря назначено ціну 2,50 пенґе, за качку 2,40, за гуску 2,70, а за курку, ідийку (пульку) і перлову курку (пантарку) 2,00 пенґе за кілоґрам.

В Припоминці Теодозія Латтова буде роздумувала над смутном подійом. В пятницю, 6. грудня/децембра 2019 р., в Пряшові прошла траґедия. Выбух ґазу знищыл 12-плянтровый будинок, згынуло осмеро люди, гідні было пораненых, остали сироты, вельох стратило доробок цілого жытя і охабили лем в тым, што мали на собі. Пришла поміч, лем мали бы сме і мы по цілым світі памятати на Русинів, котры стратили жытя і были поранены в выбуху, доказати солідарніст з нима і памят. В тым смутку приде нам ждати на різдвяны свята.

Шеруй.

О авторі

Богдан Ґамбаль

Присутний. Народил єм ся в Польковицях, на Нижнім Шлеску. Люблю ходити там де мі боронят і радити тото чого не дозваляют повідати. Люблю переносити границі. В радию Лем.фм єм од початку. Окрем радия тых моіх початків было більше - Стоваришыня і улюблена - Руска Бурса. Люблю чытати стары русиньскы ґазеты. Зачал єм публикувати іщы в Голосі Ватры. Контакт: gambal@lem.fm

Коментарі