Голосник

День Русинів тот рік в Мішколці

0
День Русинів Мадярьска тот рік одбуде ся в Мішколці. Всердежавне русиньске самосправованя в Мадярьску запрошать на шторічну подію під назвов Русинськоє Націоналноє Сято на суботу 25-го мая 2019-го року до просторів Мflішколцьской універзіты.

Покровительом тогорічного русиньского дня став Др. Жолт Шемєн, заступник премєрміністра Мадярьска із вопросів націоналной політікы, реліґії і народностей.

Передають Премію Антонія Годинкы

Як інформує головный орґанізатор, одкрытя події буде на саме полідне, коли в Авлі Мішколцьской універзіты приговорить ся Ріхард Тірчі, ведучій Головного одділіня премєрміністра з вопросів конфесійных і націоналных звязків. Участным ся має приговорити і Др. Янош Ковач, головный нотарь уряду области Боршод – Абов – Земплін, під котру належыть і Мішколць.

По приговорах буде слідовати передаваня Премії Антонія Годинкы. Премії лавреаты дістануть з рук Віктора Крамаренка, председы Вседержавного русиньского самосправованя. По тій части проґраму участны помолять ся Паракліс, котрый одслужыть владыка Атаназій (Орос), єпарха Мішколцьской ґрекокатолицькой єпархії.

Народне свято Русинів Мадярьска обогатить і концерт Заслуженого академічного закарпатьского народного хору під веджіньом Наталії Петій-Потапчук.

День Русинів Мадярьска

День Русинів є в Мадярьску выголошеный на 22-го мая. В тот день у 1703-ім році Томаш Есе в Береґсасі підняв прапор і залучів підкарпатьскых Русинів до освободженецькой войны Ференца Ракоція ІІ. Ракоцій пізніше назвав Русинів за їх вірну службу Gens fidelissima – найвірнішым народом.

Вседержавне русиньске самосправованя орґанізує тото свято каждый рік в іншім місті. В році 2018 Русины Мадярьска святковали свій день в місті Еґер.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА


Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар