Голосник

Дуже лемківского на днешнім Калейдоскопі Культур

0
Вроцлав то вельокультурове місто. Його ґаздове вєдно з другыма партнерами орґанізуют шор подій повязаных з імянинами столиці Нижнього Шлеска. Місто з той нагоды рыхтує розмаіты атракциі, котры проходити будут до 24. червця/юнія, значыт до свята покровителя міста – Йоана Крестителя.

Єдном з подій, котра пройде днес, 23. червця/юнія 2018 р., є вельокультурова стріча Калейдоскоп Культур. Про імпрезу мож сміло написати, што вписала ся уж в шор цикличных подій орґанізуваных во Вроцлаві. Того рока проходит уж 11. едиция фестівалю і традицийно концерты ай другы акциі пройдут на Слодовым Острові. Окрем того вечерня част перенесе ся до Клюбу Старий Кляштор.

Вшытко зачне ся о 13.00 год. хороводом колективів, што пройде з вроцлавского рынку на острів. Пак на сцені презентувати будут ся професийны і аматорскы ґрупы, представляючы культуру великых та малых народів. Окрем лемківской культуры вказаны будут татарска, ромска, караімска, украіньска та німецка. Специяльныма гістми тогорічной едициі фестівалю будут кольоровы танцювальны ґрупы з Ґрузиі і Украіны.

На Калейдоскопі Культур 2018 буде мож стрітити ся аж з трьома лемківскыма ансамблями. Дітячий фольклор представит ґрупа Чыжыкы. Выступит тіж меджепоколіньовий фольклорний ансамбль Розтока з Рудной, котрий од деякого часу являт ся колективом діючым при Стоваришыню Лемків. Молодого духа лемківской музыкы внесе ґрупа н’лем фольк, яка складат ся з вроцлавскых студентів.

Окрем концертів, на якых выступит близко двадцет ансамблів, проходити будут додатковы атракциі, анімациі і варштаты. Посмакувати буде мож етнічной кухні ци видіти індийскы або ґрузиньскы танці. Присутных буде і парунадцетьох выставців з розмаітыма выробами ручной роботы і ідлом.

Головным орґанізатором Фестівалю Калейдоскоп Культур є Фундация Калейдоскоп Культур, котра являт ся як ініциятива медженародного діалоґу. Головна ціль той орґанізациі то едукация для взаімной толеранциі медже народами і етнічныма меншынами. Кульмінацийным пунктом цілорічной діяльности фундациі єст як раз орґанізация реченого фестівалю, котрий приближат жытелям Нижнього Шлеска традициі і культуру такых меншын як Німці, Росияне, Украінці, Жыды, Грекы, Ромы, Караімы, Болгары ци Лемкы. Фундация рік в рік причынят ся до популяризациі культуры Русинів в столици Нижнього Шлеска.

Шеруй.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар