Голосник

Експерты Світовой банкы глядали рішіня про Сниньскый реґіон

0
Розвиток окресу Снина і пріорітно теріторії Народного парку Полонины быв у попередніх днях центром інтересу експертів Світовой банкы. Інформовала о тім словацька державна пресова аґентура TASR.

Фаохвовці на енвіроменталістіку і турістічный рух у співпраці із Пряшівскым самосправным крайом глядали рішіня на веце проблемів і інвестічны імпулзы до турістікы цінного реґіону з русиньскым населіньом. Як інформовала говоркыня краю Даша Єленьова, головным цільом проґраму загранічных експертів є посуджіня можливостей забезпечіня приступу ку воді на питя жытелям долин окресу, де не є выбудована публічна основна інфраштруктура і так само добудованя сіті драг.

Під Старинов не мають ани каналізацію

Ескперты вже стрітили ся із представителями Выходословацькой водареньской компанії і Справов і утримованьом драг Пряшівского самосправного краю і далшыма фаховцями.

Так само навщівили старостів сел в окресі Снина, жебы познакомити ся з існуючов документаційов на выбудованя енвіроменталной штруктуры. О своїх здобытых знанях інформовали і жупана Мілана Маєрьского.

„Парадоксом выникнутой сітуації є, же жытелі приблизно 20-ох сел в окресі Снина, котры суть близко найвекшого водного резервоару Старина, котрый давать воду на питя двом краям, доднесь не мають ани каналізацію. Села притім находять ся в атрактівнім оточіню Народного парку Полонины, де є величезный потенціал про розвиток турістічного руху, якый в тій локаліті хочеме розвивати,“ цітовала Маєрьского по їднаню із фаховцями аґентура.

Реґіон потребує поміч

Експерты пропонують самосправі дати зробити штудію реалізації, котра посудить вшыткы можливы рішіня забезпечіня приступу ку воді на питя і рішіню одпадовых вод. Край бы мав на то дати властны грошы.

„Сниньскый реґіон потребує нашу поміч. Будеме глядати жрідла на можливе фінанцованя штудії реалізації так, жебы мож было черьпати европскы фінанчны жрідла на выбудованя потрібной інфраштруктуры іщі в тім проґрамовім періоді,“ повів Маєрьскый. Штудія бы за його словами мала быти зроблена в першых місяцях слідуючого року.

Ефектівне черьпаня еврофондів

Актівности експертів Світовой банкы суть частьов ініціатівы Catching-up Regions про такзваны добігаючі реґіоны. Смыслом є підпорити піднятя выконности в реґіоні, достаточне роснутя і творіня робічіх місць. Так само є цільом укріпити ефектівне черьпаня зо штруктуралных і інвестічных фондів прямо в Пряшівскім самосправнім краю.

„Окрім розвитку турістічного руху в краї глядають ся і рішіня про зліпшіня енерґетічной ефектівіты будов, выбудованя ґеопорталу краю і ефектівніше перевязаня освіты і робочого рынку,“ повіла про аґентуру Єленьова.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

 

Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар