Голосник

Европарламент хоче єднакы, всядыль ґарантованы права про меншыны

0
Европскый парламент апеловав у віторок 13-го новембра 2018-го року на приятя сполочных правил в рамках Европской унії, котры бы забезпечіли решпектованя прав членів народностных менншы і заборонили їх діскрімінації.

Інформовала о тім словацька державна пресова аґентура TASR. Евродепутаты за аґентурныма інформаціями пожадали Европску комісію, жебы выпрацовала і передложыла пропозіцію інштрукції, яка бы задефіновала мінімалны нормы про меншын Европской унії. В інштрукції бы мали быти і ясны крітерії ці крокы заміряны на закінчіня діскрімінації меншын в членьскых державах.

Мати менше ненавистных проявів

Корешпондент узнесіня, словацькый евродепутат мадярьского походжіня Йожеф Надь із партії Most-Híd в інформації про медії выразив, же найважнішым цільом є знижыти чісло ненавистных проявів і проблемів, котры із них выходять.

„Вшыткы гражданы Европской унії бы мали мати можливость без страху хосновати свій материньскый язык на уліці ці у публічных просторах. Радо бы сьме выбудовали мосты меджі векшыновов і меншыновыма културами, жебы годны были взаємно акцептовати ся і підтримовати. Европска унія мусить решпектовати свою языкову і културну розмаїтость,“ повів о сітуації Надь.

Як далше інформовала аґентура, за нелеґіслатівне узнесіня голосовало 489, 112 членів европарламенту было проти і 73 евродепутатів ся стримало голосованя. Узнесіня апелує, жебы ся довєдна про вшыткых дефіновав термін народностной меншыны, што бы мало односити ся на дефініцію в Европскім договорі о людьскых правах.

Ґаранція практікованя меншыновых прав

Депутаты так само підкреслили, же членьскы державы Европской унії бы мали забезпечіти про вісем процент гражданів унії, котры належать ку народностным меншынам, можливость практіковати свої права в области културы, языка і освіты, і высловили ся за вытворіня цілоунійной сістемы на охорону меншын і пробаданя внутрішньодержавных меншыновых політік.

Депутаты акцентовали і важность охороны реґіоналных і меншыновых языків, котрыма того часу бісідує приблизно десятина жытелів Европской унії. Схвалене узнесіня апелує на Европску комісію і членьскы державы, жебы прияли крокы заміряны на підпору хоснованя реґіоналных і меншыновых языків у освітніх інштітуціях і в медіях.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар