Голосник

Фестіваль меншын Польской Республикы

0

На початку червця/юнія 2018 р. в столици Польской Республикы пройде І Фестіваль Музыкы Нацийональных і Етнічных Меншын. В рамках 7-дньовой подіі выступит пятнадцет ансамблів, репрезентуючых тринадцет меншын. Не бракне і лемківской музыкы.

Фестіваль зачне ся 1. червця/юнія, а одкрывала го буде татарска музыка. Того дня выступлят тіж Грекы, якы запрезентуют шырше середземноморскы музычны климаты. 3. червця/юнія почуєме хасидску і клезмерску музыку.

В понедільок, 4. червця/юнія, на 19.00 год. заплянувано вечер з лемківском культуром. Найперше заграт Оркєстра Святого Миколая з Люблина – ансамбль од років выгрываючий лемківскы пісні і беручий з культуры Карпат. Пак запрезентує ся Лемківскій Ансамбль Пісні і Танця «Кычера» з Ліґници. Од 25-ох років як фольклорний ансамбль, представлят він традицийны лемківскы танці, музыку та стилізуваны видовиска.

Протягом дальшых штырьох фестівальовых дни (5.-6. червця/юнія та 11. червця/юнія і 13. червця/юнія) представляны будут рытмы Ормян та Ромів, буде і польска, старолитовска і кашебска музыка та почути буде мож білорускы і украіньскы пісні.

Вступне дармо. Концерты пройдут в клюбі Гыбриды (ул. Золота 7/9, Варшава). Фестіваль фінансово підпорило Міністерство Культуры і Нацийональной Спадковины ПР.

Шеруй.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар