Голосник

Ґорлиці і Санкова мают шансу на ґеотермію

Ґорлицка земля має шансу одкрыти ґеотермію. Вшытко завдякы позитивній оціні внеску, якій вєдно з Ґміном Санкова зложыло Місто Ґорлиці до Нацийонального Фонду Охороны Середовиска, чытаме на офіцияльным сайті Містецкого Уряду в Ґорлицях.

Першым етапом робіт будут пробы вертіня в глубину землі. Внескодавці отримали близко 18,5 млн золотых на досліджыня, якы дадут одповід на звіданя, ци під земльом в околицях Ґорлиц находят ся цінны джерела. Ґеотермія была єдном з моіх мрий і, стартуючы на становиско бургомайстра Ґорлиц, обіцювал єм, што буду діял в тій темі. Днес гордо можу речы, што осягнули сме великій успіх, повіл про ґорлицкій порталь бургомайстер Рафал Кукля, якій в послідню неділю поборол в выборах і в першым етапі зас был выбраний на ґазду міста.

Про термальны воды в Санковій перший раз было чути 7 років тому, коли компанія з Кракова задумала провести вертіня в місцях по експлоатациі ропы. Товды думка втихла і на пару років была одсунена на другій плян.

Перше пробне вертіня проведене буде в Санковій, в місци, якє зарекомендує Науково-Технічний Університет в Кракові. Коли вкаже, што гевсе місце емітує тепло, буде оно пак достарчане на обшыр Ґміны Санкова і Міста Ґорлиці.

Як дале можеме чытати в пресовій інформациі, коли вкаже ся, што параметры воды будут в порядку, огріє она ґорлицкы осіля, при тым позитивно влине то на середовиско та зменшыт оплаты. Попри тым, ґеотермія то можніст побудуваня в будучности ґеотермальных басенів, якы можут стати ся новом туристичном атракцийом реґіону.

інф. за: www.gorlice.pl

Шеруй.

О авторі

Севериян Косовскiй

Народженый на чужыні. В 2014 році писал матуру з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Любитель давной Лемковины. Годен годинами слуxати про втрачене лемківскє щестя. Актуальні веде веселый проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментарі