Голосник

«Говорить Пряшів» на половину мая – пятниця, 20.00 год.

0

Хвиля не барз добра, жебы выходити з хыж. Но, але кєд дашто має ся одбывати не під голым небом, та товды заохочаме і рекомендуєме. Не лем роботом чловек жыє, та часом добрі про ідеі і реальну культуру подумати. А пропозиций, як то мы, маме вельо.

Кєд уж задумате выйти з хыжы, та най ногы Вас понесут до Крениці, де уж заран зачне ся ювілейне, Х Медженародне Бієнале Лемківской/Русиньской Культуры. Думаме, што не можете зохабити той подіі, прото, што проходит она лем што два рокы. А хто знат, што за дальшы два рокы буде? Кєд ся маме тримати принципів і головной темы, то выявиме, што на вікенд до Крениці придут тіж нашы камаратя з Пряшівщыны, ай самого Пряшова. Буде нагода побесідувати і розправити про стратеґічны проєкты.

Нич підете в подорож, днес по 20.00 год. залучте радийо. Тоты самы Пряшівчане будут голосити добре слово в поучытельным «Говорить Пряшів». Хыбаль, же уж сте выіхали, або внет підете, а будете іти до Крениці через Лемковину, то в своім авті конечно глядайте ефіру 106,6. Чужына, выізджаючы, а такой вертаючы на тоты дни Домів, тіж най си найде ефір 103,8, в Польковицях і доста далекых околицях.

Кєд уж вшытко заплянуване, то тепер порядок од нас. В днешнім премєровым проґрамі од радия Русин.фм почуєме о Петрі Милославскым, еміґранті з Росиі, музыка і першого дириґента Закарпатского Народного Академічного Хору (1946-1954 рр.). В дальшій части – Книжници.фм – міц лемківского. Почуєме вершы заслуженого поеты і політика Павла Стефановского.

 Павел Стефановскій

Як повстал мій верш

Была і є

Лемковина

был пра-пра

єст няньо і я

і буде наш край

все жывий

Справ нашых

тяг дальший

быти мусит

так хотят

Руснакы

рускы святы

я

і серця вашы

З іконостасу

выйдут героі нашы

фот. П. Басалыґа; П. Стефановскій на ІІІ Лемківскій Ватрі в Ганчовій, 1985 р.

Шеруй.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар