«Говорить Пряшів» – половина квітня – пятниця, 20.00 год.

Вельо веселости, дорогы слухачы! Дальший тыжден чытате тоты слова, котры не докінце мы самы годны розуміти. По правді мат то быти вводне слово до премєрового одтинка «Говорить Пряшів», а якоси все найде ся дака нагода, жебы і хоц-што інче вштурити.

З писаньом так уж є, што часом іде дост байка, же кєд вернете до тексту за деякій час, може ся вказати, же досправды сте зробили парада текст. А часом цілком в другій бік – не іде, і лем до пеца вштурити тото, што мысель, а часом і серце та душа на папір нанесли.

Но мы ту маме легше. Мы пишеме віртуально, та і до пеца неє што дати. Треба бы было дакій віртуальний пец-смітник задумати. Певно і ноны сут, шак світ так жене, же не годен спостеречы на новинкы, вынаходкы і інчы чачка модерного хосну. Не знаме лем ци радийо то чачко модерне, ци уж прастаре, котре выперли інчы джерела інформаций. Но то уж тема до досліджынь для університетскых люди. Нам, Лемкам, фурт, хоц бы з почутя обовязку, мусит здавати ся, што наше радийо модерне. Бо перше, бо лемківскє, бо николи сме інчого не мали.

Так і радийо ЛЕМ.фм, котре як суцо лемківскє, має партнерів в Пряшові, де як суцо русиньскы редакторы творят свій розглас. Рыхтуют про вшыткых, і Русинів з Лемковины, і Пряшівщыны, ай Підкарпатя, проґрам цікавий, богатий в інформациі з нашого світа. То голос од братів зза «горбка». В днешнім «Говорить Пряшів» м.ін. Книжниця.фм даст нам слово про Великодні традиці Миколая Гвозды. Про любителів футболю, волейболю і інчых – «болів», слово про русиньскій спорт і замішаня попри ним.

До милого слуханя, уж днес по 20.00 год. за середньолемківскым часом.


Приносиме актуалны інформації з русиньского середовиска і нелем з нього. З нашыма справами будете все актуално інформованы о найважнішых подіях і з Културным калеідоскопом вам не втече жадна културно-сполоченьска акція у вашім реґіоні.

фот. Рускій дім в Пряшові

Повязаны дописы

Польковиці 103,8 МHz
Ґорлиці 106,6 MHz