«Говорить Пряшів» – пятниця, 20.00 год.
Тоты люде непокірны, будут жалувати. Деси-м колиси чул тоты слова. Добрі грают они з днешньом погодом. Лемкы в містах вышли на улиці і зачали вказувати вшытко, што лем найліпше мают. Хоц тото, што найліпше, то годны вказувати уж лем Лемкыні.
Вказуваня свойой красы, личка, ніг, а часом такой і груды, то фурт небезпека. Шаленых не бракує, але марец не єст такій лагідний. Мала быти яр, уж сте певно колеса в возі мінили на літні, а гев – так з ничого – зачало зас курити.
На нич і тото парадуваня по місті. Тепер дост легко захворіти на якысы фрасы. Ґрипы, анґіны шаліют. Заваруй Боже ся не загортати і іщы достати запаліня ключів. Товды шпыталь муруваний. А знаме, што одтамале не все вертат ся жывым. Пробачте за тоту чорну мысель…
Знаным лікарством, котрого не перепише Вам никотрий дохтор, є просто постіль. Маме такых, якы ся уж встигли похвалити, же на кажду хвороту, як лем си ляжут, добре є радийо. Рідне слово вытігат іх од болю. Так і днес, вшыткых хворых, ай здоровых, бо тых надієме ся більше, просиме на премєру «Говорить Пряшів». Буде мудро як все. В Книжници.фм выімкы прозы Людмилы Шандальовой з книжкы «Червений берег».
Приносиме актуалны інформації з русиньского середовиска і нелем з нього. З нашыма справами будете все актуално інформованы о найважнішых подіях і з Културным калеідоскопом вам не втече жадна културно-сполоченьска акція у вашім реґіоні.
