Голосник

Ґойдіч стане покровительом міста Пряшів

0
17-го юла 2018-го року припомянули сьме собі 130 років од народжіня ґрекокатолицького єпіскопа, русиньского родолюба, священомученика Павла Петра Ґойдіча, котрый умер в комуністічнім арешті в Леополдові.
Покровитель міста

Із той нагоды в суботу 21-го юла одбуде ся в Катедралнім соборі св. Йоана Крестителя в Пряшові архієпархіялный одпуст. Як інформовав Інформачный центер Пряшівской архієпархії, іде о єдну із річніць Юбілейного рока Пряшівской архієпархії, котрый є присвященый 200-му юбілею заснованя Пряшівской ґрекокатолицькой єпархії, котра одділила ся од Мукачова.

Як далше інформовав центер, одупст зачне в суботу Акафістом ку блаженому священомученикови П. П. Ґойдічови, по котрім буде о 10.00 год. слідовати архієрейска літурґія, котру буде служыти Преосвященый владыка Йоан (Бабяк), пряшівскый архієпіскоп і метрополіта Словакії. Із той нагоды метропліта выголосить священомученика за покровителя міста Пряшів.

Павел Петро Ґойдіч

Блаженый священомученик Павел Петро Ґойдіч, ЧСВВ народив ся в родині ґрекокатолицького священика в Руськых Пеклянах коло Пряшова 17-го юла 1888-го року. По штудію в Пряшові і в Будапешті быв у 1911-ім році рукоположеный на священика і служыв на селах Пряшівщіны. У 1922-ім році вступив до Чіну св. Василія Великого (Василіяны) і став членом Мукачівского монастыря св. Николая на Чернечій горі. У 1927-ім році быв у Римі рукоположеный на єпіскопа і менованый за адміністратора Пряшівской ґрекокатолицькой єпархії. Од 1940-го року діяв як єпархіялный єпіскоп у Пряшові. У 1950-ім році быв у выконштруованім політічнім монстерпроцесі обвиненый і одсудженый на дожывотный арешт і далшы кары. Вмер в Леополдовскім арешті 17-го юла 1960-го року. 4-го новембра 2001-го року быв у Римі папом римскым Йоаном Павлом ІІ. выголошеный за блаженого. Його мощі суть в бочній каплічці пряшіского катедралного собору.

Священомученик Павел Петро Ґойдіч быв великым русиньскым родолюбом, а і будительом. В 1930-ых роках основав русиньску ґімназію в Пряшові, котру довтогды Русины із Пряшівщіны не мали. Перед переписом населіня апеловав на Русинів, жебы ся не писали нияк іншак, лем як Русины, бо так нас назвав отець Духновіч.

Ґойдіч бы знамый і як єпіскоп золотого сердця, што проявльовало ся наприклад тым, же основав і церьковный сиротинець, ці тым, же быв єдиным католицькым єпіскопом у фашістічнім Словацькім штаті, котрый в одкрытім писмі апеловав на презідента Тіса, жебы ся будь зрік свого священства, або резіґновав із функції презідента. Крітіковав протижыдівску політіку фашістічного штату, апеловав на своїх вірників, жебы помагали тым, проти котрых діє ся несправедливость і сам скрывав людей жыдівского походжіня перед транспортами. 27-го януара 2008-го року му быв уділеный тітул Справедливый меджі народами in memoriam за спасіня жывотів многых жыдівскых гражданів і його одкрыты протесты проти депортацій.

Юбілейын рік

Пряшівска ґрекокатолицька архієпархія рік 2018 выголосила за юбілейный. Окрім святкованя 200-го юбілею еріґованя єпархії і 130-ой річніці народжіня блаженого Павла Петра Ґойдіча собі припоминать і далшы вызначны річніці.

У 2018 році собі архієпархія припоминать 1155-ту річніцію приходу свв. Кіріла і Методія на Велику Мораву, 50-ту річніцю обновліня Ґрекокатолицькой церькви в бывшій Чехословакії, 30-ту річніцю выголошіня базилікы мінор в Лютині, 20-ту річніцю выданя нового словацького перекладу літурґікона, 15-ту річніцю выголошіня за блаженого священомученика Василя Гопка, 10-ту річніцю зряджіня Пряшівской метрополітной церькви sui iuris на Словакії і піднятя Пряшівской єпархії на рівень архієпархії і так само 10-ый юбілей выголошіня горы Звір в Літмановій за путницьке місце.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар