Голосник

Грдза на початок Музикы Заклятой в Дереві

0
26. мая 2019 р. концертом ґрупы Грдза з Пряшова зачне ся 13. едиция Фестівалю «Музика Заклята в Дереві». Фестіваль, якій зачне ся кінцьом мая, тырвал буде аж до серпня/авґуста. Традицийно, концерты пройдут в обєктах находячых ся на Пути Деревяной Архітектуры, в тым в вынятковых лемківскых церквах.

Пленеровый концерт пряшівской ґрупы Грдза пройде в Старым Санчы на рынку. Ансамблю шырше не треба представляти лемківскым слухачам, прото што то капеля, яка встигла запрезентувати ся серед лемківской соспільности, на Лемковині та в інчых частях Польщы. Грдза на музичній сцені задебютувала в 1999 р. Є то словацко-русиньскій ансамбль, якій в своім репертуарі презентує і шыроку музичну культуру Русинів.

Односины до лемківской традициі ґрупа збогачала як участник І Фестівалю Лемківской Авторской Творчости «Молода Лемковина», якій орґанізуваный Стоваришыньом Руска Бурса проходил в Ґорлицях осіню 2015 р. Уж рік пізнійше Грдза дішла до фіналу телевізийного шоу ČESKO SLOVENSKO MÁ TALENT. В проґрамі выступували зо словацко-русиньском співанком. Ґрупа мала нагоду грати тіж на Лемківскій Ватрі в Михалові. Солистком колективу єст Сусанна Яра, яка до репертуару ввела і лемківскы творы. Сама в своій творчости дуже присвятила лемківскій музиці. Недільный концерт збогаченый буде о выступ танцюристів зо словацкой ґрупы Бардфа.

В рамках тогорічной едициі подіі, яка тырвала буде од мая до серпня/авґуста, пройдут і дальшы выступы. Фестіваль «Музика Заклята в Дереві» то серия концертів на Пути Деревяной Архітектуры в Малопольщы, на котрый складают ся 254 деревяны забытковы обєкты. Окрем костелів, скансенів, дворів або дзвінниц, были до него зарахуваны і лемківскы церкви, котры сут єдныма з найкрасшых архітектонічных творів материяльной дідовизны Малопольщы. Так того рока проґрамовы концерты фестівалю пройдут в порогах грекокатолицкых церкви в Рыхвалді, Квятони і Брунарах. Всітри вписаны сут на листу Світовой Спадковины Юнеско. Зато же фестіваль розтягненый єст на такой штырі місяці, деталі про поєдны концерты постепенно будут являти ся м.ін. на фанпейджы Мизикы Заклятой в Дереві. Вступне на вшыткы концерты дармо.

Шеруй.

О авторі

Севериян Косовскiй

Народженый на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар