Хор Клірос выдал платню з награньом парастасу

0

Мужскій Камеральний Церковний Хор Клірос, діючий при Осередку Православной Культуры «Ельпіс» в Ґорлицях, выдал платню, на котрій записано похоронне богослужыня – Парастас. Платня выдана была з благословліня владыкы перемышльско-ґорлицкого Паісия. В період, коли вертаме до Акциі Вісла в єй смутну 70. річницю, має быти припомянутьом вшыткых жертв страдавшых в тій операциі.

Награня одбыло ся початком вересня/септембра т.р. в православній церкви св. Владиміра Великого в Креници. Реалізуване было в рамках проєкту «Бортняньского поворот до Бортного». Мельодиі згармонізуваны были через оо. Ярослава Ґрича та Любомира Воргача. В награню взяло участ  11 осіб, не лем постійны члены хору, але тіж гостинні сьвященникы з західніх земель Польщы.

Хором од самого зачатку дириґує отец Ярослав Ґрич. Хор на ціли має предовшыткым продолжуваня і розвиваня церковных співочых традиций на обшыри Лемковины. Бере участ в торжественных богослужынях, але тіж прикрашат своіма выступами ріжного рода стрічы. Выступувал м.ін. в Перегляді Коляд в Кромпахах на Словациі ци Медженародным Фестівали Східньославянскых Коляд в Тересполи. Реґулярні выступує на Медженародным Фестівали Церковных Хорів в Креници. Брал тіж участ в Ювілейным Медженародным Фестівали «Дни Церковной Музыкы» в Гайнівці в 2011 р. та в Фестівали «Псалліте Део» в Келтах, де в катеґориі хорів занял II місце. Хор Клірос од самого початку свого істнуваня єст ґаздом цикличных проєктів пропаґуючых церковний спів в Низкым Бескіді як «Бортнянского поворот до Бортного» ци «Спів з іконом на фоні. Дотепер выдал 2 платні, з колядами і з літургічныма творами.

Тота платня є першом таком, на котрій записаний был цілий парастас з піснями на галицкы мельодиі. Выдавцьом платні єст Осередок Православной Культуры «Ельпіс» в Ґорлицях. Награня дофінансовуване было з середків Міністерства Культуры і Народовой Спадковины.

Замовліня на платні мож складати на адрес elpis@vp.pl .

Share.

О авторі

Наталія Клинковска

Коментар

Zrealizowano dzięki dotacji Ministra Spraw Wewnętrznych i Administracji.
© Copyright by лем.fm. 2017. Вшыткы права застережены.