Голосник

Хто переможе 150 км?

В суботу зачынают ся змаганя в літаню по горах Лемковина Ультра Трейль. Технічны одправы та додатковы активности проходити будут уж заран. О пілночы з пятниці на суботу стартуют з Крениці беручы участ в змаганях на трасі 150 км. Годину пізнійше з того самого місця выстартуют тоты, котры выбрали трасу долгости 100 км.

Окрем двох барз тяжкых дистансів, професийны спортовці і аматоры будут змагати ся з трасами долгости 70, 48 та 30 кілометрів. Старт на тых трасах пройде в суботу. В гірскых змаганях додатковом, попри долгости, трудністю сут перевысшыня, котры треба перемочы. Для трас долгости 150, 100, 70, 48 і 30 км сут то одповідньо: +5860 м/-5970 м, +4460 м/-4660 м, +2520 м/-2520 м, +1400 м/-1310 м, +740 м/-735 м.

Своіх пят ґрошы додає тіж змінніст трасы, по котрій ся летит. Є то по части асфальт, ґрунтовы дорогы та лісовы доріжкы ци стежкы по луках. Традицийом уж є, што перед змаганями все ліє дощ, котрый спричынят, же ціла траса єст міцно розмокнена. Треба бороти ся не лем з кілометрами, але і з болотом, в котрым западают ся черевікы.

Каждорічні орґанізаторы дбают, жебы на меті в Команчы вымореным спортовцям даяк музичні, при лемківскых співанках, зробити атракцийным доходжыня до сил. Того рока, з рекомендациі ЛЕМ.фм, в суботу вечером выступит ансамбль Бурян з Ґорлиц. Декорация найліпшых пройде в суботу на вечер і в неділю перед полудньом.

Минулого рока найліпшый на трасі 150 км з результатом 17 годин і близко 3 минут был Артур Єндрых. Серед жен, з результатом 20 годин і близко 25 минут – Маргарита Пазда Позорска. До тогорічных змагань на найтяжшій трасі приголосил ся м.ін. русиньскій писменник Марош Крайняк. На 100 км одважыл ся Русин з Братиславы Ростислав Ґіра, 70 км полетит Павел Тутко з Польковиц i Владимір Гопей з Любіна, 48 км – Ярослав Морох з Вроцлавя, Адриян Горощак з Варшавы, Орест Гопей з Вроцлавя, Каміля Трохановска та Кристиян Трохановскій з Собіна. На трасу долгости 30 км рішыл ся Матеуш Бубернак з Ліґниці та Катрена Трохановска.

Фот. ЛУТ фб, Alexis Berg

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Контакт: natalia@lem.fm

Коментарі