Голосник

Іраіда Гунчак – «Лемкы»

0
В середу, 13. червця/юнія 2018 р., во вроцлавскій Ґалериі Сучасной Штукы пройде вернісаж авторской выставы Іраіды Гунчак пн. «Лемкы». Авторка, маюча лемківскы корені, інспірує свою творчіст материяльном і духовом спадковином Лемковины.

Як мож чытати в заяві плянуваной выставы, лемківска традиция є міцно існпіруюча, творит великій потенциял до розвитку в обшыри музычных інтерпретаций, а тіж в плястичных штуках. Думка взяла ся одтале, што думам, же тота культура заслугує на розголосніня. Є прекрасна, мож єй розвивати в обшыри штукы, бесідує для порталю ЛЕМ.фм І. Гунчак.

Іраіда Гунчак є студентком ІІІ рока Академіі Красных Штук во Вроцлаві. Выстава «Лемкы» є дипломовом, ліценциятском працом. Мою артистичну інтерпретацию рішыла-м оперти як раз на лемківскым фольклорі (…). На выставі презентую цикль ґрафічных прац. Найчастійше то лінорит та аквафорта. Сут то технікы клясичной технікы варштатовой, артистичной (…), продолжат артистка. Ґрафіка ділит ся на проєктову і артистичну. Артистична занимат Іраіду Гунчак, через ней авторка хоче выразити своі передуманя і одчутя. Выстава лучыт традицию з модерністю.

На одкрытю выставы о 18.00 год. выступит ансамбль молодых лемківскых студентів з Вроцлавя, н’лем folk. Выставу мож видіти лем через три дни – до 16. червця/юнія 2018 р.

Шеруй.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар