Голосник

«Iз легенд про Матяша Корвіна» і Кароль Мейсарош – проґрам «Говорить Пряшів» – пятниця, 18.10 год.

Радийо Русин.фм з Братиславы як каждый тыжден приносит порцийку вісти о плянуваных культурных подіях і роботі русиньскых інституций – музею, театру і ансамблю Пульс.

В Книжници.фм бібліотекар Ігор Латта буде чытал урывкы «Iз легенд про Матяша Корвіна». На фотоґрафіі горі памятник короля Матвія Корвіна в Сімгороді, в місті Коложварі.

Целебритом того тыжня буде мадярскій правник, історик, журналиста і громадскій діяч на Підкарпатскій Руси – Кароль Мейсарош. Вродил ся він 20. липця/юлия 1821 р. в Гайдудороґу. По Яри Народів оповіл ся за реформуваньом Австрийской Імпериі і зато мусіл одыйти на провінцию до Ужгорода. Ту робил як правник. В тым часі опубликувал Історию Русинів.

 

Мейсарош Кароль

Мейсарош Кароль, фото: www.byzantinohungarica.hu

Петро Медвід в Перличках прочытат короткы вісти надрукуваны в підкарпатскій ґазеті «Неділя» в вересни/септембрі 1942 р. Буде про заохочыня до пренумераты молодіжной ґазеты Руска молодеж і спомяне же реґентскє розпоряджыня рекомендує новинкы як чытанку до хоснуваня в школах. Дале пише ся про тото, што бідны люде могли того літа дуже заробити за назбераны в лісах плоды, головно малины. З Підкарпатя до фабрикы консерв в Будапешті одышло близко 100 ваґонів з малинами. Буде і про новорукоположеных єпископом Александром Стойком грекокатолицкых священників і про несподівану смерт протоігумена марияповчаньского монастыря отця Леонтия Дологого.

Теодозия Латтова в Припомінці буде оповідала про своі уродины. Буде роздумувала над тым, же по народинах няньо записал єй в Красным Броді до метрикы і дал єм імено. Часто люде повідают, же мат наша ювілятка прекрасне імено – Тедозия. Часто дают єй зменшены імена як Тося, Дуся, Дозя, Дозика… І хоц Теодозия выходит од свого імена, то буде споминала на інчого чловека, котрый заслужыл сой на своє красне імено – Маковицкій соловій. Буде тото про Александра Павловича в 200. річницю його народин.

Шеруй.

О авторі

Богдан Ґамбаль

Присутний. Народил єм ся в Польковицях, на Нижнім Шлеску. Люблю ходити там де мі боронят і радити тото чого не дозваляют повідати. Люблю переносити границі. В радию Лем.фм єм од початку. Окрем радия тых моіх початків было більше - Стоваришыня і улюблена - Руска Бурса. Люблю чытати стары русиньскы ґазеты. Зачал єм публикувати іщы в Голосі Ватры. Контакт: gambal@lem.fm

Коментарі