Голосник

Календарь із деревяныма церьквами здобыв оцініня

0
В цілословацькім конкурзі Найкрасшый календарь Словакії (Najkrajší kalendár Slovenska) знова здобыв оцініня Пряшівскый самосправный край. В катеґорії Реґіоны здобыв друге місце за настінный календарь Деревяны церьковці Пряшівского краю 2019 (Drevené kostolíky Prešovského kraja 2019).

Як далше інформовала Даша Єленьова, говоркыня Пряшівского самосправного краю (ПСК), успішным быв і Вігорлатьскый музей в Гуменнім, котрого зряджовательом є ПСК. Тот здобыв перше місце за календарь В комнатах… (V komnatách…), котрый фотоґрафічно захоплює інтересны просторы каштелю в Гуменнім. Тот належав родині Друґетів, пізніше Аднрашійовым.

Менше знамы церькви на фотоґрафіях Яна Штовкы

До конкурзу словацькой календарьовой творчости о Найкрасшый календарь Словакії приголошали свої творы авторы, фірмы, міста, села і краї. В складі журі были высокошкольскы педаґоґове, фотоґрафы і новинарі. Довєдна оціньовали 45 настінных і столовых календарів од 33-ох выдавателів.

„Календарь ПСК Деревяны церьковці Пряшівского краю 2019 здобыв у катеґорії Реґіоны 2-ге місце і заінтересовав серійов фотоґрафій, котрых автором є оціньованый фотоґраф Ян Штовка. Із унікатных дорогоцінностей находячіх ся на теріторії краю увагу здобыли може турістічно менше знамы деревяны церькви, но єднако цінны. В календарі мають своє місце храмы із 18-го столітя в Шеметківцях, Миролі, Прикрой, Мікулашовій (колись Никлова, позн. ред.), Доброславі, Яловій, Новоселиці, Потічках ці церьковця із другой половины 17-го столітя в Будружалі, котра є записана меджі світовы културны памяткы UNESCO,“ інформовала Даша Єленьова.

В календарі находять ся і фотоґрафії церьквей із Матисовой і Новой Полянкы, котры днесь стоять в сканзенах в Старій Любовні і у Свіднику.

Окрім календарів з церьквами і каштельом быв оціненый з Пряшівского краю в катеґорії Міста і календарь Стропків у часах Австро-Угорьска і першой Чехословацькой републікы (Stropkov v časoch Rakúsko –Uhorska a prvej Československej republiky).

Оцінены были і книжкы з Пряшівского краю

Вєдно із резултатами 27-го річника конкурзу Найкрасшый календарь Словакії 2019 выголосили ся і оцінены в рамках 12-го річника конкурзу Найрасша книжка і пропаґачный матеріал Словакії за рік 2018 (Najkrajšia kniha a propagačný materiál Slovenska za rok 2018).

Із спомеджі 19-ох приголошеных публікацій знова успішны были і выдавателі з Пряшівского краю. Місто Стара Любовня здобыло оцініня за дві публікації. Першов є книжка  Стара Любовня – реґіон многых култур на граніці Спіша і Шаріша (Stará Ľubovňa – región mnohých kultúr na rozhraní Spiša a Šariša), котра была выдана ку 50-ій річніці выникнутя окресу. Найдеме в ній і профілы русиньскых сел той области з професіоналныма фотоґрафіями. Другов публікаційов є Календарь културных, шпортовых і сполоченьскых подій (Kalendár kultúrnych, športových a spoločenských podujatí).

„Пряшівскый самосправный край здобывать в цілословацькім конкурзі найкрасшых календарів першы місця вже реґуларно. На конті має од 2008-го року шість першых місць і три другы місця. В конкурзі найкрасшых книжок і пропаґачных матеріалів в попередніх річниках быв оціненый вже вісемраз,“ інформовала говоркыня ПСК. Святочне выголошіня резултатів конкурзів проходило 9-го апріля 2019-го року в Баньскій Быстріці.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар