Голосник

КАПЛИЧКЫ МАЛОПОЛЬЩЫ_2018

0

Маршалківскій Уряд Малопольского Воєвідства оголосил конкурс пн. «КАПЛИЧКЫ МАЛОПОЛЬЩЫ_2018» для єдиниц територияльного самоуряду з обшыри малопольского воєвідства, якы хочут підняти ся консерваторскых, реставраторскых або будовляных робіт при забытковых капличках.

Заінтересувана територияльна єдиниця, жебы отримати середкы на ремонт капличкы, што ся находит на єй обшыри, потрібує выступити з одповіднім внеском з кошторисом і долученыма фотоґрафіями капличкы. Як інформує Маршалківскій Уряд, капличкы, при котрых ведены бы были консерваторскы роботы, не мусят конечно находити ся в реґістрі завытків малопольского воєвідства. Старчыт, же обєкт мат вартістны артистичны і історичны приметы. Заєдно і в тым примірі ведіня того рода робіт вымагат діяня згідного з законом про охорону і опіку над забытками.

Заплянуваны консерваторскы, реставраторскы або будовляны роботы на капличках повинны обняти не лем консервацию самого обєкту, але і терен в найблизшій обшыри. На реалізацию конкурсу передвиджено 550 000 зл, в поділі на поєдны задачы. Што основне, дотация з буджету малопольского воєвідства на реставрацию єдной капличкы може быти дана макс. до 60% загалу конечных выдатків, єднако не може пребільшыти квоты 20 000 зл.

Внескы на дофінансуваня задачы єдиниці територияльного самоуряду можут посылати до 15. марця 2018 р. О признаню дотациі рішат Сойм Малопольского Воєвідства, піднимаючы конечну постанову на внесок Заряду Малопольского Воєвідства. В лемківскых селах малопольского воєвідства доднес находят ся забытковы капличкы, якы ждут приверніня давного виду.

Задачу мож реалізувати од 1. січня/януара до 30. листопада/новембра 2018 р. Більше деталів находит ся за мотузком.

Фот. Капличка в Бодаках-Пстружным; Б. Тондос, 1962 р. 

 

Шеруй.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар