Голосник

Підтримуєме по лемківскы

0
До нашой підредакциі приходят вшелеякы листы. Часом пишут, што нас люблят, а часом горозят. Мы ся никого не боіме, але кажду вістку принимаме покірно. Тым разом отримали сме принагідну відоміст.

Вшыткы знаме, і тоты малы, і великы, што цілий світ зосереджений є тепер на Чемпіонаті Світа в футболю. Ден за дньом єдна дружына выгрыват, друга перегрыват, а сут і такы, што порівно мают. Хосен і з того. Мы надале лем мриями сой пожыєме. Нашой Нацийональной Команды Лемковины як не было, так неє.

Были пляны, ой были! Вірний патріота футболю і Карпатской Руси, якій стацийонує в Лісцу, раз ачий покликал нашу команду. Был меч высокого рівня, было зажерто і горячо. В 2009 р. Стоваришыня Лемків розограло меч з Обєднаньом Лемків. Стоваришыня выграло, хоц до перервы перегрывало. Но, реванжу уж не было. Мы лем припоминаме тоту подію тым, што ся іщы товды не народили, або переспали.

Што дале? Но, надале ждеме. Мриі нашы несполнены. Кєд бы так наша команда заграла на Чемпіонаті, серед великых дружын Ішпаніі, Німец, Портуґалиі, Бразилиі… Думаме, што ведучым дружыны был бы председа председ, тот ведучий, котрий веде вшытко сам.

Покля си не сполниме самы своіх мрий, то можеме лем выдрукувати сой афіш – розписку Чеміонату 2018, котра явила ся в лемківскым языку. Такой сама ся не явила, а зробил ю наш вірний чытач. Дякуєме – поміщаме. Другы, што нас слідят, най сой напечатают лемківску розписку і повісят деси в углі. Пальцьом най допишут нашу Нацийональну Команду Лемковины. Підтримуйте!

Клікний – побільшыт ся

Шеруй.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар