Голосник

Климківскій залив внет буде модернізуваный

0
Штучне озеро, якє од парунадцетьох років істнує в місци первістного села Климківка, і його околиці жде шор модернізацийных робіт, якы збільшат іх атракцийніст. Пройдут они протягом двох найблизшых років при берегах заливу. Вшытко з думком про туристичный рух.

Як інформувала «Краківска Ґазета», модернізация берегів заливу проходила буде в рамках великого проґраму, якій реалізуваный має быти вєдно трьома сусідніма ґмінами – Ропом, Устьом Рускым і Санковом. Про його деякы заложыня писали сме влони.

Єдном з інвестиций буде побудуваня пішых та біциґльовых стежок про туристів. Єдна з них буде мала долгіст 4 км і буде ішла од Дому Социяльной Опікы в Климківці аж по футбольовый пляц в Устю. Тоту інвестицию зреалізує Ґорлицкє Староство. Стежка буде хоснувана не лем в літнім сезоні. Зимом має быти хоснувана як нартострада.

Модернізуваны будут і берегы заливу. Тота інвестиция поділена має быти на два етапы. Одповідала буде за ню в більшости ґміна Ропа. В першым з них проведены будут працы направлены на реґуляцию і зміцніня берегів озера. На долгости 145 метрів будут побудуваны специяльны бетоновы берегы, з котрых спущены будут сходы, якыма туристы зыйдут аж до самой воды. Берег має быти безпечный і тырвалый. Другій етап то будова біциґльовой стежкы. Ґміна Ропа плянує збудувати по своій стороні 15 пляж. Окрем того рыхтуваны мают быти обставины до управляня водных спортів – м.ін. віндсерфінґу. Ропа побудує і специяльне великє задашыня, де приіздны годны будут робити пікнікы. Ґміна на свою част інвестиций передаст 3,5 млн зл.

Вшыткы інвестициі будут реалізуваны в єдным часі, жебы наконец творити ціліст. Так вшыткы три ґміны будут діяти подля єдного пляну, якій змінит климківскє озеро. Санкова выконат роботы, якы получат Климківку з Маластівском Маґуром. На тым пути збудуют дальшу біциґльову трасу. Цілю інвестиций єст збільшыти атракцийніст реґіону.

фот. google.com/maps

Шеруй.

О авторі

Севериян Косовскiй

Народженый на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар