Голосник

Колоніцьке сідло знова привітать астрономів

Село Стащін і Астрономічна обсерваторія на Колоніцькім сідлі в окресі Снина будуть од 30-го новембра до 2-го децембра знова центром традічной міджінародной конференції під назвов Колос 2017, котру орґанізує Вігорлатьска звіздарня в Гуменнім. Інформовала о тім словацька державна пресова аґентура TASR.

„Централнов темов їднаня понад 70-ох участных із Польщі, Україны, Мадярьска, Тайланду і Словакії буде досліджіня перемінных звізд, котрым є присвячена векшына із 38-ых наголошеных лекцій. Мімо головной темы одзвучать і лекції з астрометрії, ґеофізікы, навчаня астрономії і астротурістікы,“ інформовав аґентуру директор Вігорлатьской звіздрарні Іґор Кудзей.

В рамках конференції одпрезентують і єдночасно дають до ходу новый діґіталный апарат планетаріюма, котрый звіздраня купила із средств Пряшівского самосправного краю.

„Комбінаційов існуючого опто-механічного планетаріюма із новым діґіталным выникать на Астрономічній обсеваторії унікатный гібрідный планетарій, в котрім класічный апарат на промітачій куполі вычарує майже автентічне звіздне небо і діґіталный апарат нас воведе до світа чудесных можливостей сучасной діґіталной технікы у сфері планетаріюма,“ повів далше директор.

Астрономічна обсерваторія на Колоніцькім сідлі находить ся на теріторії Парку темного неба міджі русиньскыма селами Колоніця і Ладомирів. Є деташовным робочім місцьом Вігорлатьской звіздарні. Якость колоніцького неба призначіла тоту обсерваторію ку здобываню высокоякостных науковых даных, як і ку популарізації і розвитку астротурістікы. В ареалі обсерваторії суть капаціты на уквартельованя і планетарій є збудованый в рамках проєкту Карпатьске небо – Розвиток продуктів турістічного руху основаных на астрономії в реґіоні польско-словацького пограніча.

Вігорлатьска звіздраня там має своє деташоване робоче місце звудоване на выконованя фаховой позоровательской діялности. Головным робочім апаратом є Вігорлатьскый народный телескоп – того часу найвекшый телескоп на Словакії. Так само є на Колоніцькім сідлі хоснованых дакілько далшых меншых апаратів.

Конференція, котра проходить шторік, была підпорена Аґентуров про науку і досліджіня, Універзітов Павла Йозефа Шафарика в Кошыцях, Неінвестічным фондом Телескоп, Словацькым союзом астрномів і Словацькым астрономічным обществом.

Жрідло фотоґрафії: www.astrokolonica.sk

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси, в місті Пряшів. Локалпатріот. Актуалну тему з його точкы погляду мож чути каждый четверь в проґрамі Вступне до контроли о 18.10 год. Каждый робочій день од 8.00 год. мож слухати його Корзо, в котрім вас возьме до світа актуалной політікы. Контакт: petro@lem.fm

Коментарі