Конкурз Марії Мальцовской выграв Владіслав Сивый

0

Oд 4-го септембра до 24-го новембра 2017-го року Сполок русиньскых писателів Словеньска в співпраці з Академіов русиньской културы в Словацькій републіці і Інштітутом русиньского языка і културы Пряшівской універзіты в Пряшові орґанізовав 4-ый річник Літературного конкурзу Марії Мальцовской на найліпшы творы в области поезії, прозы, есеїв і драмы в літературнім русиньскім языку. Оріґіналны літературны творы было мож заганяти в россягу од 10 до 20 сторінок тексту.

Оцініня конкурзу вже традічно проходило кінцьом децембра в рамках заключного семінару, котрый одбыв ся 21-го децембра в Бібліотеці карпаторусиністікы Інштітуту русиньского языка і културы. Як в остатніх днях інформовала председкыня Сполку русиньскых писателів Словеньска Кветослава Копорова на сайті Академії русиньской културы в Словацькій републіці, тот рік приголосило ся вісем авторів, з того двоми были дебутантами. Двоє авторів загнало по два жанры.

Журі конкурзу была в складі Кветослава Копорова, Михал Павліч і Михала Голубкова і оціньовала довєдна 10 оріґіналных творів по русиньскы написаной поезії і прозы. На першім місці скінчів Владіслав Сивый, котрый ся до конкурзу приголсив по першый раз із свойов поезійов. Журі друге місце признала двом авторам – поетам, Штефанови Сухому і Юркови Харитунови. Третє місце здобыла так само з поезійов Людмила Шандалова.

Урывкы із вшыткы до конкурзу загнаных творів буде традічно публіковати часопис Русин в рамках рубрікы Поздравліня Русинів на рік 2018.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Share.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар

Zrealizowano dzięki dotacji Ministra Spraw Wewnętrznych i Administracji.
© Copyright by лем.fm. 2018. Вшыткы права застережены.