Голосник

Концерт для Ганці – in memoriam

0

Текучый рік привитал нас смутном вістю, коли з жальом інформували сме слухачів радия лем.фм і чытачів нашого порталю о смерти нашой близкой приятелькы, Анны Дрейович, котра несподівано одышла до Вічности в першый ден Рождества Христового, 7. січня/януара 2019 рока.

На похоронны богослужыня, якы одбыли ся 11.-12. січня/януара 2019 рока, окрем родины помершой, зъявило ся вельо знаємых, приятелів, спілпрацівників Ганці. Ґорлицка православна церков св. Тройці аж і не годна была помістити вшыткых, што хотіли попращати Ганцю в єй послідній земній дорозі. По Божескій Літургіі, яку очелювал высокопреосвященнійшый Паісий, архієпископ перемышльскій і ґорлицкій, в словах владыкы, якій дякувал вшыткым за присутніст, мож было почути головный переказ, в котрым фурт являло ся єдно – жытя Анны Дрейович было розспіване. Своім прекрасным голосом славила Бога, так співаючы вчас богослужынь в своій парохіі, як і концертуючы з церковныма хорами.

Была тіж членком і солистком леґендарной Лемковины, співала з вызначным фольковым ансамбьом Серенча, може мало хто памятат, же мож єй было чути і на награнях з поч. 90. років минулого столітя, де разом з сестром співали в поп-роковых лемківскых музичных проєктах. Остатні рокы свойого жытя музично провела в професийональным, вельо раз нагороджуваным на вшелеякых фестівалях хорі Канторес Карвацияні.

На прадзник Срітенія Господнього, бо товды выпал сороковый ден по смерти, в якым православна Церков в своєрідный спосіб возносит молитвы за усопшых, єй близкы і парохіяне в ґорлицкій церкви св. Тройці молили ся за єй душу.

Іщы єдна подія прошла в минулый вікенд в Ґорлицях. З ініциятивы приятелів Ганці, в клюбі «Декаденция» одбыл ся в суботу, 16. лютого/фебруара 2019 рока, концерт in memoriam. Была то нагода поспоминати і припомнути сой милый усміх Анны Дрейович посеред знаємых в музичных обставинах, якы были нерозлучном частю Єй жытя.

І мы будеме памятати!

Шеруй.

О авторі

Демко Трохановскій

Актуальні ховат дві дівкы, а медже, по і попри тым - шефредактор інтернетового порталю lem.fm. Любитель языків. Вшыткых языків.

Коментар