Концерт школярок і школяря Юлиі Дошны в Білянці

0

В найблизшу суботу, 18. листопада/новембра, в Народным Домі в Білянці одбуде ся концерт Юлиі Дошны і єй школярів.

Выступ проходит на закінчыня проєкту Мастер Традициі. Од початку того рока Мазярска Загорода в Лоси орґанізувала варштаты співу в рамках реченого проґраму, вчас котрых Юлия Дошна, як мастер, вчыла ґрупу охочых розмаітых, забытых лемківскых народных співанок. Зачала єм од Кольберґа, бо од штырьох років студиюєме з Антонийом Пільхом [польскым лютнистом, котрий акомпаніює Ю. Дошні – прип. ред] творы з томів, котры він 200 років тому записал – бесідує про выбір репертуару Юлия Дошна, піснярка з Лоси. Коли Клявдия Збєґень з Мазярской Загороды вказала мі, што записал проф. Райнфус 60 років тому в Лоси і сусідніх селах, то так ня то заняло, же векшіст співанок, котры будеме презентувати, то сут пісні записаны вчас тереновых досліджынь професора. Сут то пісні, котры, примірово, хоц записаны в Лоси, то уж іх Лосяне не співают. Тых пісен нихто не знат.

Співочы варштаты з Юлийом Дошном ведены сут в рамках проґраму Міністра Культуры і Нацийональной Спадковины Мастер Традициі. Єст то черговий того рода проєкт реалізуваний Мазярском Загородом в Лоси, рік скорше Мастером Традициі был Богдан Карел, сницар з Лоси.

На місце тогорічных варштатів выбрано Білянку, жебы навязати до музычных традиций села, котре давнійше было особливым музычным центром. Теоретичні варштаты ведены будут до кінця рока, але ґрупа, котра ся зобрала, хоче стрічати ся дале. Хочут тіж долучыти до ней новы особы. Для більшости варштатовичів сут то початкы співаня ци співаня в ґрупі. Серед них сут люде, якы не походят з Лемковины, але од деякого часу гев мешкают і хочут познавати культуру і традицию того реґіону.

Пісні записаны проф. Райнфусом, котрых вчат ся варштатовиче, походят з колекциі Стоваришыня Народных Творців з Люблина. Награня были удоступнены Мазярскій Загороді скорше, в рамках орґанізуваной ньом стрічы про Лося і лосяньскых мазярів.

Концерт зачне ся о 15.00 годині і проходил буде в рамках Дня Сеньора в Білянці.

Фот. горі: Роберт Вербанов

Share.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од штырьох років доносит о вшыткым, што ся діє на Лемковині. І не лем. Контакт: natalia@lem.fm

Коментар

Zrealizowano dzięki dotacji Ministra Spraw Wewnętrznych i Administracji.
© Copyright by лем.fm. 2017. Вшыткы права застережены.