Голосник

«Короткій зарис вшыткого» вертат до Вроцлавя. Буде на Театральній Олимпіяді

Пєса в режысериі Лемка – Тео Думского не зохабила ся на премєрі і парох другых выступлінях. «Короткій зарис вшыткого» замірює вказувати дальшы успіхы, но тым разом на професийональных театральных фестівалях. 18. жолтня/октобра т.р., од 21.00 год. пєсу буде мож взріти на Театральній Олимпіяді во Вроцлаві, в Кіні Новы Горизонты, в рамках подіі Нижньошлезска Плятформа Театру. Сміло мож речы, же спектакль вертат до Вроцлавя, прото, же як раз днес ціла ґрупа заанґажуваных подорожує в рамках Октобер тур, одвиджаючы м.ін. Квідзын, Варшаву та Будaпешт.

«Короткій зарис вшыткого» то пєса, котра дотулят і в якысій мірі лемківского світа, бо універсум пєсы мож вносити до каждого світа. Пєса при схоснуваню новаторскых технолоґій оповідат історичну візию світа, зачынаючы од його сотворіня аж по його конец. Істория бо, вказувана при хоснуваню модерной технолоґіі, але оповідана без слів, підносит пробу дост одважной інтерпретациі подій і вказаня соспільных процесів, котры влияют на нашу долю. Гейбы на долю Лемків тіж, понеже і серед нас заходят вшелеякы процесы, будучы початком, але і кінцьом чого-небуд. Другє пізрніня лемківскости спектаклю проявлят ся в тым, што споменено на зачатку. Режысером являт ся Лемко – Тео Думскій, котрий в приземным світі называт ся Владимір Хомяк. То професийональний артиста, абсольвент Державной Высшой Театральной Школы ім. Л. Сольского во Вроцлаві. Вчас його предрежысерскых змагань, Хомяк діял в середовиску Стоваришыня Лемків, будучы м.ін. конферансиєром Лемківскых Ватр на Чужыні в Михалові (на єдній з них вказал свій фільм пн. Был єм гев, котрий вказувал артистичну візию гляданя достоменности молодым чловеком, котрий дознає ся, же єст Лемком), та заграл ролю Михала Костяка в фабулярным фільмі Андрия Копчы, Акция Вісла ч. І. 


Заран (11.10) «Короткій зарис вшыткого» доступний буде і на фестівали «Лялька тіж чловек», котрий проходит в Варшаві. Більше – за мотузком.

Шеруй.

О авторі

Севериян Косовскiй

Народженый на чужыні. В 2014 році писал матуру з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Любитель давной Лемковины. Годен годинами слуxати про втрачене лемківскє щестя. Актуальні веде веселый проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментарі