Краль Убу буде мати свою русиньску верзію

0

По літі зачала нова театрална сезона і новы премєры буде мож видіти і в Театрі Александра Духновіча в Пряшові, професіоналнім театрі, котрый грає по русиньскы. Першов тогорічнов премєров, котру Духновічовці оголосили на на 27-го октобра, буде прославленый Краль Убу од Алфреда Жарі в режії Браня Мазуха.

„Татко Убу є товстый, нечестный, глупый, незрілый, некомпетентный, ненасытный, крутый, боязливый і підлый. Напрік тому, но правдоподобно скоріше як раз зато, тота карікатура высоко поставленого політіка прийде у фіктівнім польксім кральовстві ку властям, накраде, зожере і зничіть, што ся лем дасть. Історія Татка Убу є абсурдно комічна і гуморна, но єдночасно в нас выклилкує вопрос: што докаже заставити ненасытню людьску тугу по моци і маєтку? І докаже єй обще штось заставити у аморалных особ без одношіня до такых вартостей, якыма суть правда, право і справедливость?,“ пише ся в анотації театру ку пєсі.

Краль Убу є найзнамішым твором французького поета, романописателя і драматіка Алфреда Жарі і є браный як попередник абсурдной драмы. Жарі є так само автором науковой пародії знамой як патафізіка. Краля Убу написав в році 1896 як лялькову пєсу і такой ся з того стала тема – втогды в неґатівнім значіню.

„Політічно-воєньска авантура Татка Убу є пародійов рецесістічного французького автора Алфреда Жарі на класічны театралны пєсы. Оріґінално пєся про ляльковый театер, котра вже на кінцю 19-го столітя в Паріжі в театрі Théâtre de l’Œuvre выкликала шкандал, наконець стала ся ключовым текстом про як раз выникаючі умелецькы напрямы, якыма были дадаізм, суреалізм і абсурдный театер. Но сучасна політічна сітуація нелем в Польщі жанрово тот твор посувать скоріше ку реалізму аж гіперреалізму,“ пише ся далше в офіціалнім тексті анотації.

Премєра Краля Убу одбуде ся в пятніцю 27-го октобра 2017-го року о 19.00 год. на Великій сцені Театру Александра Духновіча в Пряшові.

Фотоґрафія: „Досправдовый портрет Татка Убу“, автор Алфред Жарі. Жрідло: Wikipedia.

ТЕКСТ НАПИСАНИЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Share.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар

Zrealizowano dzięki dotacji Ministra Spraw Wewnętrznych i Administracji.
© Copyright by лем.fm. 2017. Вшыткы права застережены.