Голосник

Кружльова честує павшых за свободу рекордным написом

0
Село Кружльова, котре находить ся в окресі Свідник, має словацькый рекорд за найвекшый горізонталный напис в єкстерьєрі – Údolie smrti (Долина смерти). Інформовала о тім аґентура SITA.

Новый напис, котрый наіншталовали в місцяці апріль 2019-го року, має быти за словами старосты села Кружльова – Адріяна Ґужа, почестованьом памяткы вшыткых павшых вояків і припомянутьом собі тяжкых страт на жывотах і страшных боїв, котры на тых місцях пороходили почас Другой світовой войны.

Співпраца Польща – Словакія

Напис быв наіншталованый на місці, котре має єднаку назву – Долина смерти, і як раз ту одбыла ся найвекша танкова битва Карпато-дукляньской операції. Має розміры 998 х 290 центіметрів і має быти фотоґенічнов домінантов і турістічным тяглом.

Выникнув в рамках мікропроєкту Долина смерти – земля войновых героїв, котрый быв фінанцованый із Европского фонду реґіоналного розвитку. З проґраму Interreg V-A Польща Словакія 2014 – 2020 село на проєкт здобыло понад 49 600 евр. Із державного розрахунку Словакії ішло понад 5800 евр і співфінанцованя села было нецілых 3000 евр.

Мікропроєкт реалізовав ся з участьов словацького і польского партнера – Ґміны Дукля, здружінь і орґанізацій, котры занимають ся розвитком, підпоров і пропаґаційов той културной і природной дідовизны реґіону під Дукльов.

Збудовали алтанкы і інформачны табліці

В рамках мікропроєкту было наіншталованя єкстерьєрового напису лем єднов частьов цілой реалізації. Як інформовав староста Ґужо, выбудовали ся і два алтанкы, єден в селі Гавранець, другый в Кружльовій. Алтанкы служать як сполоченьска і оддыхова зона.

Далшов актівностьов была іншталація інформачных табліць в каждім селі мікрореґіону, на котрых суть інформації о найвызначнішых особностях, котры діяли на тій теріторії, і котры мали історічну роль при освободжованю теріторії почас Другой світовой войны. Надруковав ся і інформачный білтен о історічных і културных памятках в девятьох селах мікрореґіону Долина смерти.

Памятка на бої

Меджі селами Кружльова, Капішова і Нижня Писана є в терені розміщена танкова техніка, котра зображує танкову роту в атаці. Сімболізує єй вісем танків T-34/85, чім ся навщівникам припоминають танковы бої, котры в тім просторі проходили од 25-го до 27-го октобра 1944-го року. Долина, в котрій проходили найтяжші бої, належыть до музею на Дуклі.

ТЕКСТ НАПИСАНЫЙ В ПРЯШІВСКЫМ СТАНДАРДІ РУСИНЬСКОГО ЯЗЫКА

Шеруй.

О авторі

Петро Медвідь

Народженый в центрі Пряшівской Руси в Пряшові. Локалпатріот. Кавярньовый валюх. Актуалну тему з його точкы погляду мож чути каждый четверь в проґрамі „Вступне до контроли“ о 20.00 год. Контакт: petro@lem.fm

Коментар