Голосник

Ластівочка оцінена двараз протягом двох місяци

0
Лемківскій Ансамбль Пісні і Танця «Ластівочка» з Пшемкова на Нижнім Шлеску, котрый діє при місцевым Кружку Стоваришыня Лемків, был протягом двох послідніх місяців оціненый престіжныма нагородами в обшыри фольклору.

Колектив найперше отримал оцініня під конец червця/юнія в Казімєжу, а о нецілы два тыжні вчас загальнопольского співочого фестівалю в Шпротаві.

Нагорода для хору і солисты

В днях од 27. до 30. червця/юнія хор ансамблю презентувал традицийну лемківску пісню на 53. Загальнопольскым Фестівалю Капель і Народных Співаків в Казімєжу. На фестіваль, рішыньом Маршалківского Уряду Нижньошлезского Воєвідства, поіхала 12-особова ґрупа Ластівочкы. Окрем лемківского ансамблю, на тым престіжным фестівали выступило більше як 800 народных артистів, котры запрезентували пісні і музику зо вшыткых реґіонів Польщы. Ластівочка з Пшемкова заняла 3. місце в катеґориі співочых ансамблів. Жырі доцінило і члена хору, співака Данька Горощака, якому признано другу нагороду в катеґориі солистів.

Головном цілю фестівалю єст охорона традицийного репертуару та традицийного стилю музикуваня і співу. Конкурсова комісия підчеркнула, што народный спів і музикуваня то сутьова част нематерияльной культуровой спадковины, котру треба плекати і хоронити перед загыбаньом. Жырі звернуло увагу, што того рока серед участників явили ся представникы нацийональных меншын (м.ін. лемківской етнічной меншыны) та што дальшый раз рівен фестівалю был барз высокій. На казімєрскій сцені запрезенутвало ся 20 капель, 32 співочы ґрупы, 14 інструменталистів, 27 солистів та 28 ансамблів в конкурсі Великій-Малый.

Хор оціненый і другій раз. Головна нагорода для Ластівочкы

О два тыжні хор колективу взял участ в 27. Загальнопольскым Співочым Фестівали «Земля і Пісня», якій прошол в днях од 5. до 7. липця/юлия в Шпротаві. Подібні як в Казімєжу, на подіі презентувала ся співоча ґрупа ансамблю, котра так само представляла богатство народного лемківского співу.

Вчас подіі представляло ся близко 30 ансамблів, найдале на західні землі Польщы пришли ґрупы з Мазовша. В недільне пополудне, 7. липця/юлия, улицями Шпротавы прошол хоровід участників. В центрі міста внет одбыл ся ґальовый концерт. По ним жырі представило результаты тогорічной едициі.

Grand Prix фестівалю в катеґориі традицийного співу отримала як раз Ластівочка. Фондатором головной нагороды, котра трафила в рукы лемківского колективу, был Шпротавскій Дім Культуры. Окрем лемківского хору, вчас фестівалю оціненых было і вельо польскых ансамблів.

«Плеканя фольклору і реґіональных традиций, едукация діти і молодежы в вельопоколіньовым музикуваню заслугуют на найвысшы слова доцініня і пошаны для думкодавців, орґанізаторів та амбасадорів фестівалю, а предовшыткым для участників, інструкторів і опікунів ґруп» – чытати мож было в справописі з тогорічной едициі подіі.

 фот. архів ЛАПіТ «Ластівочка»
Шеруй.

О авторі

Севериян Косовскiй

Народженый на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар