«Лемкам примусово выселеным…» – пропамятна таблиця на Бучыні

0

8. листопада/новембра т.р., в ден покровителя бучыньской церкви св. Димитрия Солуньского, місцеву православну парохію навщівил владыка вроцлавско-щеціньской єпархіі, архієпископ Юрий. По Божескій Літургіі, попри церкви была посвячена таблиця в памят жертв депоратицйной акциі Вісла.

Парохіяльний праздник зачал ся попереднього дня всеночном. На другій ден, по посвячыню воды та привитаню владыкы Юрия, котрий перший раз пришол на Бучыну зо свойом пастырском візитацийом по інґресі на катедру вроцлавско-щеціньской єпархіі, при участи дальшых священників была служена літургія. По ній, вчас крестного ходу вколо храму св. Димитрия, владыка посвятыл новоположений камін з таблицьом присвяченом Лемкам депортуваным в 1947 році на західні землі Польщы.

На таблици окрем загальной сентенциі навязуючой до округлой 70-річниці выгнаня, поміщены остали русиньскы села, з якых были выселены предкы днешніх прихожан бучыньской парохіі. Найдеме на ній села: Баниця, Бортне, Брунары, Білична, Білцарева, Вафка, Высова, Ізбы, Климківка, Крива, Перунка, Ставиша, Снітніця, Фльоринка і Чарна. В слові до вірных архієпископ Юрий дал притиск на ролю і значыня ґенерациі люди якы по примусовым переселіню на західні землі на ново будували свою достоменніст. Зато не смотрячы на загорожыня, в першій черзі старали ся орґанізувати церковне жытя на чужыні.

До той поры подібны таблиці были одкрыты при православных храмах на чужыні, м.ін. в Зимній Воді і Пшемкові, та в центрі села Высока. На праздник Архангеля Михала, в найблизший віторок, 21. листопада/новемвра, пропамятна таблиця буде посвячена в Михалові.

фот. Євген Габура

фот. Петро Пласконь

 

Share.

О авторі

Севериян Косовскый

Народжений на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Контакт: seweryjan@lem.fm

Коментар

Zrealizowano dzięki dotacji Ministra Spraw Wewnętrznych i Administracji.
© Copyright by лем.fm. 2017. Вшыткы права застережены.