Голосник

Лемківскы лісы – інтервю з меценасами Соколом і Вшолком з Ґорлиц – віторок, 18.10 год.

Запрашаме на інтервю з юристами Павлом Соколом і Мареком Вшолком, котры ведут правну канцелярию в Ґорлицях. Оповідят нам они про нелегку дорогу до доходжыня звороту втраченых в рамках акциі «Вісла» лемківскых маєтків.

Зосередиме ся головно на темі звороту лемківскых лісів, бо як раз про того рода власности іщы доднес годны бороти ся выселены Лемкы, а в більшости уж іх потомны.

Єдным з наслідств выгнаня Русинів в 1947 р. было беззаконне позбавліня правильных маітелів іх прав до ґаздівок, землі і як раз лісів. Як іде про ґаздівкы, лукы і орны поля, то внет по выселінях были они приділены товдышньом польском дежравом до рук другых приватных осіб. Зас лісны парцелі, котры до 1947 р. находили ся в руках сельскых ґаздів, рішыньом власти были переданы на Державный Скарб, стаючы ся уж не приватном, а державном власністю.

Правны радці Павел Сокіл і Марек Вшолек сут першыма правниками, котры шырше заняли ся допомаганьом привертати людям іх маітельскы права. На основі выборотых перед Найвысшым Судом розвязань довели до того, што жаданя про зворот лісных ґрунтів Лемкы годны складати сут аж до кінця 2019 р. Прото бесіда буде підсумуваньом дотеперішніх дій.

В інтервю звідали сме меценасів про процедуры, статистикы выборотых і фурт веденых справ, церковны маєткы, котры так само сут правуваны перед польскыма судами, як тіж про моральны одчутя іх клієнтів по успішно одзысканых маєтках.

Інтервю проведене было 11. листопада/новембра тр. в канцеляриі в Ґорлицях. Бесіда ведена была в польскым языку. Днес о 20.00 год. і в найблизшый четвер, 21. листопада/новембра, о 20.00 год. опубликуєме в двох частях списане інтервю на нашым інформацийным портали. Інтервю доступне буде тіж в нашых радийовых подкастах.

Шеруй.

О авторі

Севериян Косовскiй

Народженый на чужыні. В 2014 році писал матуру з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Любитель давной Лемковины. Годен годинами слуxати про втрачене лемківскє щестя. Актуальні веде веселый проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментарі