Голосник

Лемківска Ватра на Чужыні 2017

0

Традицийно в перший вікенд серпня/авґуста Стоваришыня Лемків просит на русиньскій фестіваль – Лемківску Ватру на Чужыні. Тогорічна XXXVII едиция пройде в днях 4.-6. серпня/авґуста, там де все – на ватряным поли в Михалові. І хоц до Ватры остало іщы кус часу, днес хочеме загальні заявити про тото, што уж знаме – деякы атракциі і предовшыткым музычны жанры, якы тот рік будут домінувати на ватряній сцені.

Згідно з першыма інформациями од орґанізаторів, окрем постійного сценічного проґраму, про ватрянів буде зрыхтувана проєкция нового документального фільму «Аж і слезы не старчыли / Even Tears Were Not Enough», якій змістом присвячений є 70. річниці нашого выгнаня. На фестівали будут і дальшы акценты повязаны з річницьом акциі «В», але треба памятати, што Ватра несе поклін выселеным не лем вчас округлых річниц – од долшого часу польскы парляменатристы, запрошены гості з околичных самоурядів, як тіж діти і внукы тых, котры досвідчыли выгнаня, складают квітя при пропамятным камени.

Што ся стало уж традицийом михалівскых ватр, в пятницю, 4. серпня/авґуста, капітула Стоваришыня Лемків вручыт нагороду ім. Никыфора (Епифана Дровняка) за осягніня в пошырюваню, за розвиток і плеканя лемківской культуры та достоменности. Влони перший раз премія была передана посмертно.

На михалівскій сцені не бракне музыкы і співу заєдно про молодых, як і старшых. Буде і русиньскій фольклор, і модерны звукы, і лемківскы ґрупы, і ансамблі, якы творят по лемківскы. Придут так постійны выступуючы, як тіж такы, што на Лемківску Ватру на Чужыні зайдут перший раз або по долгых роках неприсутности.

Про детальний проґрам будеме внет інформувати.

Шеруй.

О авторі

Севериян Косовскiй

Народженый на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Студиює на юридичній факульті Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар