Голосник

«Лемківскій Ґанок» в конкурсі Польской Туристичной Орґанізациі

0
Проґрам радия ЛЕМ.фм «Лемківскій Ґанок» веденый Якубом Зиґмунтом буде зголошеный до конкурсу Польской Туристичной Орґанізациі «Туристичный Журналиста 2018 Рока».

Докладні зголошеный єст першый одтинок проґраму, в котрым была бесіда з Зузанном Длуґош – туристичном провідничком, аніматорком свобідного часу і передовшыткым локальном патріотком з Мушыны. В бесіді могли сме почути як раз о Мушыні, єй істориі і культурі. Окрем того дознали сме ся барз вельо про локальну кухню і тото, што давно, 100 років тому іли Лемкы і Полякы, якы прожывали на обшыри Мушыны і Сандецкого Бескіду. Не мож повісти, же то не была барз «смачна» бесіда!

«Туристичный Журналиста Рока» то конкурс, цілю котрого єст выріжнити найліпшы пресовы материялы, радийовы авдициі, відеоматериялы, фоторепортажы та телевізийны проґрамы выемітуваны даного рока. Материялы мусят промувати Польщу як туристичный напрям. Выріжнены будут тоты зголошыня, котры пошырюют державну туристику та в особливый спосіб вказуют красны місця в Польщы. Нагороды будут переданы в 4 катеґориях: відео, фоторепортаж, радийова авдиция і статя.

Більше о конкурсі мож ся дознати за мотузком.

Лемковина як раз єст красным місцьом в Польщы і вартат бесідувати о ній більше і більше. Прото явила ся думка, жебы зголосити одтинок радийового проґраму «Лемківскій Ґанок» до того конкурсу. Заповід того одтинка, емітуваного 24. вересня/септембра 2018 р., можете чытати за мотузком, а о Зузанні і єй діяльности чытайте на сайті Baba z Gór і на фейсбуковым профіли Baba z Gór.

Результаты конкурсу будут явны 28. лютого/фебруара 2019 р.

фот. www.pot.gov.pl

Шеруй.

О авторі

Jakub Zygmunt

Sądeczanin. Rodowity Lach. Miłośnik Łemkowyny. Włóczykij i górołaz. Z wykształcenia geolog, choć więcej w życiu pracował z dziećmi i młodzieżą, niż ze skałami. Uczy się łemkowskiego.

Коментар