Лемківскє буґі на Мості Культуры в Люблині

0

В пятницю, 11. серпня/авґуста, на Мості Культуры в Люблині заграт ґрупа зо Львова Лемко Блюґрас Банд та люблиньска Капеля Древутня. Буде мож загуляти і пoслухати карпатского буґі, лемківского блюґраса, гуцульского блюса, приспівок кантрі і славяньского фольку з обшыри погранича. Обі ґрупы грают енерґічні, з гумором, а коли треба – співают і ліричны балады.

Творчіст львівского проєкту ЛББ то получыня карпатского і американьского фольку та популярной музыкы, поданой в неповторным акустичным выконаню. Музыкы ЛББ на фольковій і роковій сцені выступуют од давна. Сут членами знаных львівскых ґруп, як Бурдон, Люди Добрі ци Гыч Оркестра. Концертуют на европейскых і американьскых сценах, а своі заграничны вандрівкы сут ім інспірацийом. Почуты звукы вплітают пак в карпатску музыку.

Капеля Древутня приближат публиці давны народны пісні обшыри польского погранича в автроскых аранжациях. На репертурар ґрупы входят руснацкы, украіньскы, аж і шлезскы співанкы, пісні з Малопольщы ци любельской землі. Характерным для ансамблю єст хоснуваня лем акустичных інструментів. Почути мож украіньску сопілку, росийску волынку, балалайкы ци гуцульскій бубен. Древутня кус і експериментує зо звуком, вводячы інструменты з еґзотичных культур, прим. ірляндскы свисталкы, полудньовоамериканьскє реко-реко ци монґольскій дошпулдуур.

Концерт одбуде ся в пятницю 11. серпня/авґуста о 20.00 год. на мості Марияна Лютославского в Люблині в рамках Моста Культуры. МК є інтердисциплинарным артистично-анімацийным проєктом Центра Культуры в Люблині, в рамках котрого орґанізуваны сут розмаіты едукацийны варштаты, концерты, фільмовы проєкциі, стрічы, занятя, родинны пікнікы, танцувальны показы і забавы, выставы та інчы артистичны ініциятивы. Вшыткы одбывают ся на спомненым скорше мості ім. інж. М. Лютославского в Люблині при ул. Замойскій.

Вступне дармо!

Фот. Фанйпейдж Моста Культуры.

Share.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од штырьох років доносит о вшыткым, што ся діє на Лемковині. І не лем. Контакт: natalia@lem.fm

Коментар

Zrealizowano dzięki dotacji Ministra Spraw Wewnętrznych i Administracji.
© Copyright by лем.fm. 2017. Вшыткы права застережены.