Голосник

Лемко-Союз кличе на Талергофскій Ден Памяти

0
Русиньска еміґрацийна орґанізация Лемко-Союз, яка рік-в-рік вертат до своіх долгых, найліпшых традиций, просит 3. серпня/авґуста 2019 р. на Талергофскій Ден Памяти, котрый пройде в Гіґанам в штаті Коннектікет в ЗША.

В короткым проґрамі передвиджено богослужыня, а пак спільне припоминаня жертв єдного з ґеноцидів русиньского народа. Талергоф і Талергофці – вязні першого концентрацийного лаґру в Европі, сут Лемко-Союзом припоминаны все в першый вікенд серпня/авґуста.

Бесіда про діяльніст і панихіда

Проґрам тогорічных упамятнінь зачне ся бесідом про діяльніст днешнього Лемко-Союза і інчых русиньскых орґанізаций в Америці. Споминове слово буде і на Карпаторусиньскє Общество в ЗША, і Карпатскій Інститут в Гіґанам, якій веде проф. Поль Бест. Дискусия про соспільну діяльніст еміґрантскых орґанізаций одбуде ся в бібліотеці Інституту, котра так само находит в Гіґанам. Бібліотека зберігат много цінных публикаций, памяток і артефактів зо збіркы давного Лемко-Союза. Ціла інституция, яком опікує ся проф. Бест, находит ся серед гарді положеного сельского лісика.

По годинній презентациі в проґрамі єст панихіда памяти жертв. Богослужыня одбудут ся в каплици побудуваній на обшыри Інституту, яка серед будівель, в котрых сохраняный єст маєток давного Лемко-Союза, од років засвідчат про русиньскы жертвы террору.

Пікнік серед архіву

По споминовій части орґанізаторы кличут і на русиньскій пікнік. Вчас подіі буде можніст придбати русиньскы выдавництва, як і отримати дармовы примірникы деякых лемківскых книжок. Теперішні ґаздове Лемко-Союза дбают на едукацию Русинів, прото зрыхтуваны будут ксерокопіі русиньскознавчых выдань та передрукы ґазет, котры доступны будут до свобідного хосну. Вчас попередніх пікніків была ачий можніст отримати ориґінальны примірникы старых публикаций Лемко-Союза, м.ін. леґендарну «Нашу Книжку», котром захопляли ся родакы в Старым Краю в тяжкых хвилях по выселіню.

В ден подіі доступный до перезераня буде такой цілый архів давной орґанізациі. Продолжана єст обшырна діяльніст Лемко-Союза. Заслугы довоєнного і пізнійшого Лемко-Союза для покріпляня лемківской достоменности сут неоцінены.

Шеруй.

О авторі

Севериян Косовскiй

Народженый на чужыні. Родове гніздо: Ізбы, Ждыня, Ясюнка та Реґєтів і Ріпкы. В 2014 році писал матуру з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису «Бесіда». Любитель давной Лемковины. Годен годинами слуxати про втрачене лемківскє щестя. Актуальні веде веселий, дискотековий проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментар