Голосник

Лемковина без смоґу

Малопольскє воєвідство, а властиві столиця того реґіону, переходит тяжкы хвилі. Над Краковом зберат ся велика хмара шкідливого смоґу, котрий жытя неєдного Краковяка, в тым і жыючых гын Лемків, замінят в пекло. Доходят до нас голосы, же деякы жытелі найвекшого міста Малопольщы носят уж охоронны маскы.

Інакше ситуация выглядат на Лемковині. Пришли гын науковці і зробили порядок. Хоц, по правді, не мусіли го робити, бо наша крас земля то не великы метрополиі, де жытя летит два раз скорше. Же тоты науковці мудры – свідчыт результат досліджынь. Вказало ся, же Лемковина чыстым простором світя єст, та не горозит жадному Лемкови нич. Навет веце – Лемкы не мусят носити масок на міру тых з Кракова.

Як заявлят сайт Радия Краків, через остатні дни в лемківскым здрою – Высові, міряна была чыстота повітря. Вказало ся, же не єст злі! Гірскій климат противдіє тому, што в Кракові называют смоґом. Высівяне бесідуют, же самы ся на тото старяют. В пецах палят лем екопаливами. Помалы і великы санаториі перешли ґу технічным новинкам і змінили спосіб грітя.

Вшытко тото справлят, же можеме чути ся безпечны. Очывидно, лем тоты, што мают щестя жыти в себе – на Лемковині. Як в тых на чужыні? – Не знаме. Най ся мают. Уфф…

Шеруй.

О авторі

Севериян Косовскiй

Народженый на чужыні. В 2014 році писал матуру з лемківского языка. Завершыл юридичный факультет Вроцлавского Університету. Окрем того што гев, час-до-часу дописує до часопису Бесіда. Любитель давной Лемковины. Годен годинами слуxати про втрачене лемківскє щестя. Актуальні веде веселый проґрам Чірч Ґрамофон (віторок і четвер по 21.00 год.). Контакт: seweryjan@lem.fm

Коментарі