Голосник

Лемковина Ультра Трейль – днес старт!

0

В ночы з пятниці на суботу (21.-22. жолтня/октобра) будут проходити першы старты в змаганях в літаню Лемковина Ультра Трейль 2016. То уж третя едиция тых гірскых змагань в літаню і подібні як влони, серед стартуючых находит ся лемківска репрезентация.

В тогорічній едициі до выбору єст аж пят трас о долгости: 150 км (ЛУТ 150), 80 км (ЛУТ 80), 70 км (ЛУТ 70), 48 км (Лемко Маратон) і 30 км (Лемко Трейль). Трасы ведут прекрасныма верхами і долинами Лемковины, а найдолша перетинат цілий Низкій Бескід – почавшы в Креници а скінчывшы в Команчы. Трасы вызначены сут Головным Бескідскым Путьом. Трафляют ся такы єй фраґменты, де неє ниякого контакту з цивілізацийом. Окрем перевысшынь на трасі, трудністю можут быти непередвиджены метеоролоґічны обставины. В остатніх тыжнях погода для никого не была ласкава, зато треба брати до увагы, же, окрем вынятковых пережыть зо змагань, буде мож вынести кілоґрамы болота… Трасы двох найдолшых трас, 150 і 80 км, переходят через Маґурскій Нацийональний Парк, зато іх годины стартів сут так подуманы (пілніч і перша в ночы з Крениці), жебы обшыр Парку літачы перетинали за дня. В польскых нацийональных парках єст перепис, же в ночы на іх обшыри нихто не може ся находити.

Емілия Ґардоцкі, Андрий Прибыло, Павел Тутко, Кристиян Трохановскій і Петро Левкович (вшыткы зо заходу), як передставникы лемківской нациі, бороти ся будут з ріжныма дистансами: 80 км, 48 км i 30 км. В змаганях берут участ в найбільшій ступены Полякы, але і Бритийці, Чехы, Французы, Голендры ци Мадяры. Мета трас находит ся в Команчы (а єдной – ЛУТ 80 – в Гыровій). Там, в суботу навечер, по декорациях, заплянувано концерт ґрупы А Де То Давнійше Строіло і спільну інтеґрацию при огниску. Закрытя меты на трасі 150 км заплянуване нав неділю 23. жолтня/октобра о 11.00 год.

Радийо ЛЕМ.фм тримат медияльний патронат над подійом.

lut-east lut-west

Фот. горі: П. Думас, сайт ЛУТ.

Шеруй.

О авторі

Наталія Малецка-Новак

Хоц по школі інжынєр, то не тыкат ся роботы по тзв. фаху ;) Зато уж од вельо років доносит о вшыткым, што ся діє на Лемковині. І не лем. Контакт: natalia@lem.fm

Коментар